Көлік министрі Марат Қарабаев 30 шілдеде таксистердің қалааралық тасымалға шығуына тыйым салынуы мүмкін екенін айтқан. Министрдің айтуынша InDrive және «Яндекс.Такси» жүргізушілері трассада жылдамдық шегін сақтамайды жол апатына себеп болады.
«Өзге елде мұндай агрегаторлар 50 шақырымнан аспайтын жерде ғана жұмыс істеуге құқылы. Ал одан алыс жолға автобус жүруі керек. InDrive-тің 50 шақырымнан алыс жолға жолаушы тасуға мүмкіндігі болмайды», — деген еді М.Қарабаев.
Сондай-ақ министр оң рөлді немесе оң жақтағы рөлді солға ауыстырған машиналар заңсыз жолаушы тасымалдап жүргенін айтты.
«Toyota Alphard қатысқан жол апаты көбейіп кетті, сондықтан қауіпсіздік мақсатында автобуспен жүрген жақсырақ», — деді министр.
Жақында ғана «Альфард» қатысқан тағы бір жол апаты болып, алты адам көз жұмды, екеуі полиция қызметкері.
Бірақ бұл бастамаға таксистер наразы. Бүгін үкіметте өткен брифингте М.Қарабаев шектеу күн тәртібінен алынғанын айтты.
«50 шақырым немесе 100, 150 шақырымнан көп жүрмеу жайлы министрлік ұсыныс немесе ереже енгізген жоқ. Мұны қоғам дұрыс түсінсін деп айтып отырмын. Шектеуге қатысты ешқандай өзгеріс енгізу немесе қоғамдық талқылау өткізу жоспарда жоқ. Бұл жұмыс тобы мүшелерінің агрегатор қызметін жақсарту жөніндегі ұсынысы болатын», — деді министр.
Сондай-ақ ол InDrive пен «Яндекс.Такси» бұдан былай оң рөлді машинаны тіркемейтінін айтты. Ал 2025 жылы 1 қаңтардан бастап рөлі сол жаққа ауысқан көліктер де агрегатор қосымшасынан алынады. ІІМ жиі жол ережесін бұзатын таксистер тізімін жасайды, агрегаторлар оларды да қатардан шығарады.
Қазақстандағы такси қызметін реттейтін «Автомобиль көлігі туралы» заң бойынша оң рөлді машинамен жолаушы тасуға болмайды. Бірақ агрегаторлар мұндай машинаны тіркеп, жолға шығуға рұқсат беріп отыр.
Қазір мамандар «Жолаушыларды таксимен тасу жөніндегі автотранспорт қызметі» стандартын дайындап жатыр. Ол бойынша «жолда жүргеніне15 жылдан асқан және 500 мың шақырымнан көп жүрген машинаны такси қызметіне пайдалануға» тыйым салынады.
Комментариев: 0