Машинадағы түрлі функцияны басқаратын барлық батырманы сенсорлы панельге ауыстыруға журналистер мен тұтынушылар жиі наразылық білдіреді. Бірақ олардың пікірі объективті зерттеуге емес, жеке тәжірибеге негізделген. Швециялық Vi Bilägare басылымы осы дауға нүкте қоюға бел буды, олар түрлі сынақ өткізіп, экран мен батырманың қайсысы тиімді екенін анықтады.
Журналистер сынақ жасау үшін ортаңғы консолі түрлі батырма мен тұтқаға толы 17 жастағы Volvo V70 универсалы мен салонда үлкен экран орнатылған 11 заманауи машинаны таңдады, қатарында Tesla Model 3, Hyundai Ioniq 5, Volkswagen iD. 3, Volvo C40, BMW iX, қытайлық MG Marvel R секілді электромобильдер бар.
Сынақ барысында жүргізуші орындық жылытқышты қосу, салон температурасын бірнеше градусқа көтеру, радио қосып, белгілі бір радиостанцияны таңдау, борттық компьютер көрсеткішін жаңарту және аспаптар панелінің жарығын төмендету секілді тапсырмаларды орындады. Мұның бәрін 110 км/сағ жылдамдықта жүзеге асыру керек болды. Әрине, сынақ алдында жүргізушілер аталған функциялар қалай іске қосылатынымен толық танысты.
Нәтижесінде V70 бәрінен үздік нәтиже көрсеткен. Жүргізуші барлық тапсырманы орындауға 10 секунд жұмсады, осы аралықта универсал 300 метр жол жүрді. Ал MG Marvel 5 салоны күнделікті тұрмысқа ең қолайсыз екені анықталды. Тапсырмаларды орындауға 44.9 секунд кетті. Бұл кезде жүргізуші 1.3 шақырым жол жүрді.
Зерттеушілер сенсорлы панельмен жұмыс істегенде жүргізуші оны жанасу арқылы сезіне алмайтындықтан, қай жерді басатынын қарап қана білетінін айтады, оның үстіне интерфейсі тым күрделі әрі түсініксіз. Басылым бұған мысал ретінде BMW iX-ті атады. Неміс кроссоверінің нәтижесі — 928 метр және 30.4 секунд.
Ал медиакешен экраны мен қарапайым батырманы аралас қолданатын машиналар V70-пен шамалас нәтиже көрсеткен. Мысалы, Dacia Sandero-ның көрсеткіші — 13.5 секунд, ал электрлі Volvo C40-тың нәтижесі — 13.7 секунд.
Комментариев: 0