Краш-тест нәтижесін рентгенмен көруге болады

Mercedes-Benz краш-тест жүргізу әдісін жетілдіру бойынша ұзақ мерзімді жұмыс нәтижелерін жариялады. Шарттар өзгермеді, бірақ ақпарат жинаудың мүлде басқа тәсілі пайда болды.

Компания Фрайбургтегі Фраунгофердің жылдам процестер динамикасы институтымен және Эрнст Мах институтымен бірлесіп, секундына 1000 сурет түсіре алатын арнайы камера жасады. Бірақ қарапайым слоу-мо үшін емес, ол ұзақтығы микросекунд болатын рентген импульсімен сәулелегенде машинаның деформациясын жазып үлгеру үшін қажет.

Неміс автоөндірушісі әлемде бірінші болып краш-тест рентгенін жасады. Арнайы жабдық орнатумен қатар, қалыңдығы 40 см радиациядан қорғайтын қабырға, салмағы 45 тонна металл есікті бункер салу қажет болды. Мамандар сәулелегішті (жиілігі 1 кГц сызықтық үдеткіш) жоғарыға орнатты, ал цифрлы кескін қабылдағышты зертхана еденіне қойды.

Сынақ нәтижесінде инженерлер жүздеген соққы суретін алып, кейін оны видео түрінде жинады. Бұл оларға лезде бұзылатын көліктің ішіндегі физикалық процестердің ретін көруге және талдауға мүмкіндік береді. Мысал ретінде манекен қойылған C-класс седанының бүйірлік краш-тест кезіндегі суреттері жарияланды.