Қазір тек туристерден, яғни жүргізуші, жолаушы немесе жаяу жүргіншілерден әр адамға 0.1 АЕК алынады. Экономика министрлігі дайындаған Салық кодексіне түзету енгізу жобасына сай, ұлттық саябаққа кіргенде балалар мен студенттер 0.05 АЕК және 0.075 АЕК төлейді. Ересектер үшін баға өзгермейді. Бірақ көлікке бөлек ақы төлеуге тура келеді:
- 0.2 АЕК — мотоцикл, мопед және квадроциклге;
- 0.3 АЕК — жеңіл автомобильге;
- 1 АЕК — орын саны 16-дан аспайтын шағын автобус пен жүк көлігіне;
- 2 АЕК — орын саны 32-ге дейінгі автобусқа;
- 3 АЕК — орын саны 32-ден көп автобусқа.
«Ерекше қорғалатын табиғи аумақтарға кіру тегін болғандықтан, онда келетін көлік құралдарының саны жыл сайын артып келеді. Оның үстіне көлік иелері қоршаған ортаның ластануына байланысты жауапкершілік арқаламайды. Автомобиль адамға қарағанда қоршаған ортаға көбірек зиян келтіреді (шу, лас газ, зиянды химиялық заттар шығарады, шудан жабайы жануарлар үркеді)», — дейді жоба әзірлеушілер. Олардың айтуынша, жаңа норма халықты жаяу серуендеуге ынталандырып, табиғи кешендердің сақталуына оң әсер етеді.
Құжат қаңтар айының соңына дейін талқыланады. Одан кейін депутаттардың қолына өтеді. Демек 2022 жылы көктемнен бастап тұрғындар табиғат аясына шыққанда көбірек шығындалуы мүмкін.
(2022 жылы 1 қаңтардан бастап АЕК 3063 теңге болады.)
Комментариев: 0