АҚШ-та айрықша Toyota FJ Cruiser аукцион арқылы саудаланады. Машина керемет жүрісімен не аса қуатты моторымен емес, жұмсақ шатырымен ерекшеленеді.
Қызығы, Toyota мұндай FJ Cruiser-ді мүлде шығармаған. Көліктің өңін Newport Convertible Engineering компаниясы өзгертті. Машина тюнинг шеберлерінің қолына түскен 35 модельдің бірі.
Су жаңа кезінде бұл жол талғамайтын көлік 30.5 мың долларға бағаланды. Ал 2008 жылы иесі оны алу үшін 46.5 мың доллар жұмсаған, әрі бұл 17 дюймдік TRD дискілері, Bilstein тіреулері мен Air Lift Performance жасаған пневматикалық аспа сынды қосымша дүниелерді қоспағандағы сома.
Темір тұлпардың гаражда қаңтарылмай, белсенді қолданыста болғанын одометрдегі 191 мың миля (308 мың шақырымға жуық) деген көрсеткіштен байқауға болады. Иесі көліктің шатыры мен әйнегі ауыстырылғанын жазады. Бірақ шанағында сырылған, мүжілген жерлер бар, рөлі мен жүргізуші орындығы тозған, бұрылыс шамдары да шытынап кетіпті.
FJ Cruiser бәссаудаға түседі. Бастапқы бағасы — 13 мың доллар.
Комментариев: 0