Бір-екі жыл бұрын Сингапур Жапония, Германия және Франциядан кейін электрлі самокатпен жаяу жүргіншілер жолында жүруге тыйым салды. Тәртіп бұзушылар айыппұл төлейді, тіпті түрмеге де қамалуы мүмкін. Бұған жаяу жүргіншілердің қатысуымен болатын оқыс оқиғалардың көбеюі себеп болған. Енді жергілікті билік азаматтарды «самокат жүргізу куәлігін» алуға міндеттеп отыр.
Жаңа ереже 2021 жылы 30 маусымда күшіне енеді. Қолда бар ақпаратқа сүйенсек, «самокат жүргізу куәлігін» алу қиын емес. Онда машина жүргізу құжатын алғандай практикалық емтихан тапсырудың қажеті жоқ. Тек теориялық сұрақтарға жауап берсе болғаны. Әрі оны онлайн режимде тапсыруға болады.
Бірнеше жыл бұрын Сингапур соты 57 жастағы әйелді электросамокатпен қағып кеткен 18 жастағы жергілікті тұрғынды 445 000 сингапур доллары (шамамен 142 394 535 теңге) көлемінде өтемақы төлеуге міндеттеді. Зардап шегушінің миы шайқалып, бір айға жуық комада жатқан.
Қазақстанда электросамокат басқару үшін арнайы құжат талап етілмейді. Бірақ полицейлердің айтуынша, көліктің бұл түрі мопедке теңестірілген. Олардың жаяу жүргіншілер жолында жүруіне тыйым салынады. Алайда бұл ережені елеп жатқан ешкім жоқ.
Комментариев: 0