Проезд по трём новым трассам должен стать платным с 1 января

Үш бірдей жаңа тас жолмен жүру 1 қаңтардан бастап ақылы болуы тиіс

Инвестициялар және даму министрлігі ақылы жолдарды дамыту жоспарымен бөлісті.

Алматы — Қорғас, Алматы — Қапшағай және Астана — Теміртау тас жолдарындағы төлем жасау бекеттері тестілік режимде ағымдағы жылдың қазан айынан бастап, яғни белгіленген мерзімнен бір ай ерте жұмыс жасай бастағанын Kolesa.kz тілшісіне ҚР ИДМ Автомобиль жолдары комитетінде айтып берді. Жол мамандарының сөзінше, қазіргі таңда автожолдарда орнатылған құрылғылар автокөліктердің мемлекеттік нөмірін дұрыс оқып, көлік салмағын, білігі мен басқа да қажетті параметрлерін анықтауды үйренуде екен. Жолдың ақылы бөлігіне өту барысында автокөлік датчиктер мен бейнекамералар арқылы белгіленіп, ал шығар кезде шлагбаум алдындағы терминалдағы көрсеткіш тақтада көлікке қатысты барлық мәліметтер шығады, бірақ әзірге төлем сомасы 0 теңге деп көрсетіледі. (Жаңа ақылы жолдармен қалай жүру керектігі жайлы Kolesa.kz бұрында баяндаған болатын).

Тестілік режим 2018 жылдың 31 желтоқсанына дейін жалғасады деп күтілуде, ал 2019 жылдың 1 қаңтарынан бастап үш бірдей жаңа ақылы тас жолдағы жүргізушілерден төлем алына бастайды. Бұл шақта шенділер тарифтер жайын да нақтылауы тиіс. Төлем мөлшерлемелерінің жобасы жуырда жария болған еді, қазір ол мақұлдау және бекіту кезеңінде. Және соңғысы, осы жылдың соңына дейін көліктің алдыңғы әйнегіне жапсырылып, терминал алдына тоқтамай-ақ төлем жасауға мүмкіндік беретін RFID-белгілері бар арнайы жапсырма қағаздарды тегін тарату мәселесін шешу жоспарлануда.