Infoalmaty.kz базасы «Сергек» базасымен біріктіріледі деген ақпарат шыға салысымен, алматылық жүргізушілерді ендігәрі камералар қадағалайды деген сыбыс тарады. Бірақ Kolesa.kz тілшісіне қалалық шұғыл штаб мамандары хабарлағандай, ақпарат дұрыс жеткізілмеген.
Жуырда жиналған деректер базасының өзге жүйемен синхрондалғаны рас, алайда ол камералармен емес, полицейлердің планшетіне орнатылатын «Сергек. Патруль» қосымшасымен біріктірілді. Аталған бағдарламаның көмегімен тәртіп сақшылары жүргізушілер мен жаяу жүргіншілердің қала ішінде еркін қозғалуға рұқсатының бар-жоғын тексереді.
Анықтама ретінде: қазіргі уақытта жиі қолданылып жатқан ҚР ӘҚБК-нің 476-бабына (Төтенше жағдай режимін бұзу) сай, ережені елемегендерге 10 АЕК көлемінде айыппұл салу не 15 тәулікке қамауға алу жазасы қарастырылған. Ал бейнетіркеу жүйелері заң бұзғандарға ескерту жасап, қамауға ала алмайды (ҚР ӘҚБК-нің 50-бабы: «Әкімшілік қамаққа алуды судья айрықша жағдайларда осы бөлімнің Ерекше бөлігінде көзделген шектерде тағайындайды.»).
Комментариев: 0