Қараша келісімен полиция ресейлік машиналарды тексере бастады. Бұған РФ ІІМ-нің Қазақстанда 88 мың «ауадағы» көлік бар деген мәлімдемесі себеп болды. Олар көрші елде есептен шығарылып, біздің елде заңсыз құжатпен жүр екен. 66 мың машинаның жасы 10-нан асқан, үштен бір бөлігі Волга автомобиль зауытының өнімі.
Тәртіп сақшылары шетелден келген көліктерді тоқтатып, жүргізушіге Әкімшілік кодекстің 590-бабы, 2-бөлігіне сай айыппұл салады да, техниканы айыптұраққа жібереді. Бұл жағдай көлік иелеріне ұнамағаны анық, олардың біразы ХҚКО-ға аттанса, қалған бөлігі машинасын сатуға қойып жатыр.
Бір апта ішінде Kolesa.kz-тегі Қазақстанда «кедендік тексерістен өтпеген» деген белгісі бар көлік саны 37 032-ден 42 233-ке (14 %) өскен.
Арасында Lada (ВАЗ) көп. 9 қараша күні сайтта 16.4 мың «лада» сату туралы хабарландыру болған. Бір аптада шетелдік ВАЗ 17.2 %-ға көбейді.
Бөтен елде есепте тұрған Daewoo да аз емес. Ай басында оның саны 2888-ден 3578-ге артты, ал маркаға тиесілі көліктердің жалпы саны бес мыңнан сәл асады.
Сатылымда шетелдік Toyota да кездеседі. Қазір 6.7 мың Toyota сатылып жатыр, бір апта бұрын 6 мың хабарландыру бар еді. Кезінде Армениядан талай «тойота» келген, қазір Ресейде тіркелген 200-ге жуық машина табасыз. Хабарландыру бергендердің көбі көлік есепте тұрғанын және заң тұрғысынан таза екенін жазыпты.
Үш жолақты жалауы бар нөмір таққан машина алу лотерея іспетті. Көліктің Ресейдегі иесі кез келген уақытта оны есептен шығаруы мүмкін, ал Қазақстан азаматы ол жайлы полиция тоқтатқанда ғана біледі. Мұндай жағдайда ол айыппұл төлеп, көлігін айыптұрақтан алуға мәжбүр болады әрі мәселе мұнымен бітпейтіні белгілі. Дегенмен, егер ресейлік машина міну жөнінде шешім қабылдасаңыз, міндетті түрде арнайы сервистер көмегімен тексеріп алыңыз.
Комментариев: 0