Мәжіліс депутаттары Әкімшілік кодекске енетін өзгерісті екінші оқылымда қабылдады. Құжаттың бір тармағында 615-баптағы қозғалысқа қатысушылар қатарына электросамокат жүргізушілерін кіргізу керек деп жазылған.
Бұған дейін осы категорияға тек велосипедші, мал айдаушы, арбалы көлік құралын тізгіндеуші және көлікте отырған жолаушылар кіретін. Самокатшы тізімде жоқ, сондықтан оны жол ережесін бұзғаны немесе апатқа себеп болғаны үшін жауапқа тарту өте қиын болды.
Түзету күшіне енсе, электросамокат жүргізушілерін мынадай жаза күтіп тұр:
- жол ережесін елемеу — 2 АЕК айыппұл;
- адам зардап шеккен, бірақ қылмыстық жауапқа тартуға жатпайтын немесе материалдық шығын келтірген жол апаты — 10 АЕК айыппұл;
- бір жыл ішінде қайта ереже бұзу — 10 АЕК;
- адам зардап шеккен немесе шығын келтірген апатты қайталау — 20 АЕК немесе 12 сағат қоғамдық жұмысқа тарту немесе 3 күн қамау.
2026 жылы бір АЕК 4325 теңге болады.
Жүргізуші куәлігі жоқ немесе одан айырылған адам электросамокат тізгіндесе кикшеринг компаниялары да жауапқа тартылады және 25 АЕК айыппұл арқалайды. Куәлігі жоқ самокат жүргізушісі жол апатына себеп болып, адам зардап шексе немесе шығын келтірсе 40 АЕК айыппұл төлейді.
Мәжіліс құжатты сенатқа жолдады, кейін Президент қол қоюы керек. Кодекске енген өзгерістер қабылданып, ресми жарияланса, 6 айдан соң күшіне енеді.
Комментариев: 0