Үкімет «2026–2028 жылдарға арналған республикалық бюджет туралы» заң жобасын дайындады. Құжатқа сай 2026 жылғы 1 қаңтардан бастап айлық есептік көрсеткіш (АЕК) 4 325 теңге болады — бұл қазіргіден 10 % жоғары (биыл 3 932 теңге). Айлық есептік көрсеткішпен бірге автомобилистер төлейтін төлемдер де өседі.
Жол ережесін бұзғандар көп айыппұл төлейді
Мысалы, жылдамдықты 10–20 км/сағ асырған, қауіпсіздік белдігін тақпаған, шлемсіз жүрген немесе тоқтау және аялдау ережесін бұзған жүргізуші төлейтін 5 АЕК айыппұл мөлшері 2026 жылы 1 қаңтардан бастап 21 625 теңгеге өседі (қазір 19 660 теңге).
Бағдаршамның қызыл түсіне өткен, жылдамдықты 20–40 км/сағ асырған, көлікті мүмкіндігі шектеулі жандарға арналған орынға қойған немесе жаяу жүргінші өткелінде жолаушыға жол бермеген жүргізуші 10 АЕК айыппұл төлейді, оның мөлшері 39 320-дан 43 250 теңгеге көтеріледі.
Ал жүргізуші куәлігінен айырылған адам рөлге отырса немесе жол-көлік оқиғасы болған жерден кетіп қалса, айыппұл (50 АЕК) 196 600 теңгеден 216 250 теңгеге дейін өседі.
Утиль алымы қымбаттайды
Утиль алымының базалық мөлшерлемесі (50 АЕК) 196 600 теңгеден 216 250 теңгеге өседі. Соған сәйкес қозғалтқыш көлемі 1000 текше см-ден аспайтын жеңіл автомобильді елге кіргізу үшін 324 375 теңге беруге тура келеді. Мотор көлемі 1001–2000 текше см-ге дейінгі машина үшін қазынаға — 756 875 теңге, 2001–3000 текше см-ге дейінгі көлік үшін — 1 081 250 теңге, 3 литрден жоғары техника үшін 2 486 875 теңге аударасыз. Елге электромобиль әкелгендер бұл алым түрін төлемейді.
Автомобильді есепке қою құны өседі
Автомобильді алғаш тіркегенде сұралатын ең төменгі сома (0.25 АЕК) 983 теңгеден 1081.25 теңгеге жоғарылайды. Шыққанына 3 жылдан аспаған машина алған тұлға төлейтін сома (50 АЕК) 196 600-ден 216 250 теңгеге артады. Ал 3 жыл бұрын және одан ерте шыққан машинаны алғаш есепке қою үшін (500 АЕК) енді 1 966 000 емес, 2 162 500 теңге жұмсайсыз. Яғни алым мөлшері 200 000 теңге өсті.
Сақтандыру сомасы өзгереді
1 қаңтардан бастап сақтандыру полисінің құны да артады. Өйткені базалық сақтандыру сыйақысы айлық есептік көрсеткішке байланысты — 1.9 АЕК (2025 жылы 7470.8 теңге). Бірақ қаржы нарығын реттеушілер жүргізушінің сақтандыру класындағы коэффициентке өзгеріс енгізуді жоспарлап отыр. Ол қалай жұмыс істейтіні қазірше белгісіз, бірақ полис бағасы өзгеретіні анық.
Комментариев: 0