Ресейге ЕЭО-дан көлік кіргізу ережесі өзгереді

Ел билігі Ресейге одақ құрамына кіретін елдерден автомобиль жеткізгенде төлем жасау тәртібін қатаңдатты. Жаңа ереже биыл 1 сәуірде күшіне енеді.

Министрлер кабинетінің баспасөз релизінде «Ресейге ЕЭО елдерінен келетін автомобильдердің кедендік бағасы түсуі салдарынан төленбеген алым-салықтың бәрі утиль алымына кіреді және оны жеке тұлға да, заңды тұлға да бірдей төлейді. Бұл ЕЭО елдерінен көлік кіргізген азаматтар мен компаниялар автомобильді Ресейде алып, заңда бекітілген алым-салықты толық төлейтін тұрғындармен салыстырғанда негізсіз аз шығындалатын жағдайдың алдын алуға мүмкіндік береді» деп жазылған.

Демек, Ресейге машина импорттаушылар Қазақстан, Қырғызстан сияқты мемлекеттердің кедендік алым сомасындағы айырмашылықты төлейді. Осы орайда қазір Ресейге кетіп жатқан көліктің көбі Қазақстан арқылы өтетінін айта кеткен жөн.

Drom.ru Ресей электромобильді кедендік тазартудан өткізу процедурасын міндеттеуді де көздеп отыр деп жазды. Біздің елде мұндай көлік үшін салық сұралмайды.

Билік осы істі қолға алса, автомобиль импорттау Ресей тұрғындарының қалтасына едәуір салмақ салатыны анық.