Ресейдің ІІМ 2022 жылдың алғашқы алты айында елде 4.2 мыңнан аса көлік ұрланғанын хабарлады. Оның үстіне ай сайын мұндай қылмыстың саны артып келеді. Мысалы, қаңтарда 459 машина ұрлығы тіркелсе, мамыр мен маусымда ай сайын 900-ден аса көлік қолды болды.
Ұлттық автомобиль одағының вице-президенті Антон Шапариннің айтуынша мұның бәріне машина және автобөлшек тапшылығы себеп болып отыр. Алдағы алты айда жағдай бұдан да нашарлауы мүмкін.
«Бұрын машинаны бөлшектеп немесе сол күйінде сатудан түсетін пайда тәуекел етуге тұрмайтын, ал қазір бәрі қымбаттап, жағдай қиындағандықтан, ұрылар белсенді бола түсті. Көлікті бөлшектеп сатса да, сол күйінде сатса да сұраныс жоғары. Ұсталған автобөлшек сататын сайттарда жұмыс қызып жатыр: ұсыныс та көп, сұраныс та көп. Қазірше бізде автокөлік жеткізетін қосымша тәсіл жоқ. Демек тапшылық артып, жағдай ұрылар үшін тиімді бола түседі», — деді маман Kommersant.ru басылымына.
Оның айтуынша Ресейде көлік ұрлығы көбейе береді. Ұрланған машинаны шетелге шығарып, есепке қояды. Заңгерлер жоғалған көлікті іздеу жұмысы өте нашар жүріп жатқанын айтады.
Ресейде екінші нарықтағы көлік бағасы кейінгі жарты жылда 17 % өсті. Оның үстіне елде ескі машина сатылымы төмендеп кеткен. «Автостат» басылымы 2022 жылы маусымда тұрғындар 350 мыңға жуық жүрген көлік сатып алғанын хабарлады, бұл былтырғы маусыммен салыстырғанда 32 % аз.
Қолда бар ақпаратқа сүйенсек, ресейлік депутаттар автокөлік пен қосалқы бөлшек ұрлығын 10–15 жылға түрмеге қамалатын ауыр қылмысқа теңестіретін заң жобасын әзірлеп жатыр.
Комментариев: 0