Заңнамаға енгізілетін түзетулер жөнінде ҚР ішкі істер министрі Ерлан Тұрғымбаев хабарлады. Бас полицейдің сөзінше, ішкі сауда ережелеріне автобазарға барып бөлшек сатпас бұрын, көлік иесін саудагерге машинаның техникалық төлқұжаты мен өзінің жеке куәлігін көрсетуге міндеттейтін өзгерістер енгізу жоспарланып отыр.
Министр ҚР ӘҚБК-нің 204-бабына (Пайдаланылған азық-түліктік емес тауарларды қабылдау және сату туралы заңнаманы бұзу) сатушы мен сатып алушының әкімшілік жауапкершілігін нақтылайтын өзгерістер енгізілетінін атап өтті.
Жаңа норманың қалай әрекет ететіні белгісіз. Дегенмен бөлшек қабылдайтындарды тауар өткізгендердің құжатындағы мәліметті арнайы журналға тіркеуге міндеттейтін сияқты. Бір жағынан, азаматтардың көлігі болмаса да, аккумуляторды тұрмыстық қажеттілік үшін алуына ешкім тыйым салмайды. Ал егер ол аккумуляторды утилизацияға өткізбек болса, рұқсат беріле ме екен?
Комментариев: 0