Ресей Volkswagen активтерін бұғаттады

Калугадағы Volkswagen зауытының тағдырын шешу мәселесі тағы біраз созылатын сияқты. «Коммерсантъ» таратқан ақпаратқа сүйенсек, Ресей компания активтерін бұғаттаған.

Шектеуге ГАЗ тарапынан сотқа түскен арыз себеп болыпты. ГАЗ өкілдері Нижний Новгородта көлік құрастыру туралы Volkswagen-мен жасалған келісім күшін жоюды жарамсыз деп танып, автоөндірушіден 15.6 млрд рубль шығынын өндіріп беруді талап етті.

Анықтама ретінде: Нижний Новгородта Volkswagen Taos кроссовері мен бірнеше Škoda моделі шығатын.

ГАЗ компаниясы Volkswagen Group-тың Ресейдегі бүкіл мүлкін (ақшадан басқа) бұғаттауды сұрады. Сот бұл талап орынды деп тапқан. Енді алпауыт концерні Ресейдегі үлестес кәсіпорнын жаба алмайды, оны қайта құру да мүмкін емес.

Volkswagen және Škoda көліктерін өндіру процесі былтыр наурызда тоқтаған еді. Күзде БАҚ компания Калугадағы зауытты алатын инвестор іздеп жатқанын хабарлады, ал жақында машина құрастыратын алаң «Авилон» меншігіне өтуі мүмкін деген мәлімет шықты.