Қытайдағы көлік иелерінің көңілінен шыққан модельдер

Қытай сапа ассоциациясы жаңа энергия көзімен (NEV) жүретін электромобиль мен гибрид мінгендер арасында сауалнама жүргізіп, көлігіне қаншалықты көңілі толатынын анықтады. Жалпы деңгей өскенмен, көлік сапасына қатысты мәселе әлі бар. Жеке сегменттерде үздіктер қатарына жергілікті және шетелдік брендтер кірді.

Машинасына риза клиенттердің орташа индексі 100-ден 80 ұпайға жетті. Бұл былтырғы көрсеткіштен 1 ұпай жоғары. Электромобиль мен гибридтің рейтингі бірдей, бірақ электромобильге көңілі толғандар былтырмен салыстырғанда 2 ұпай көп. Дегенмен NEV категориясына кіретін автомобильдер әлі дәстүрлі қозғалтқышы бар көліктерден қалып келеді.

100 жаңа көлікке шаққандағы ақау саны бойынша жергілікті өндірушілер шетелдік компаниялардан жоғары тұр. Нарықтағы орташа көрсеткіш 18 орынға көтеріліп, 109-ға жетті. Зерттеушілер «цифрлық кабина», жүргізуші ассистенттері сияқты заманауи технология клиенттерге қиындық келтіретінін атап өтті. Бұл шағымдардың шамамен 60 %-ын құрайды.

Компакт электромобильдер арасында Wuling Hongguang Mini EV үлесі басым, сәл ірі модельдерден тізімге VW ID.3 және Tesla Model 3 кірді. Audi Q4 e-tron, Tesla Model Y және Lixiang-ның бірнеше моделі тұрғындарға ұнаған. Tank-тің гибрид жол талғамайтын көліктері және BYD-дің электромобильдері мен гибридтері де рейтингтен орын тапты.

Сауалнама ретінде жүрген зерттеуге биыл 25 мыңнан астам адам қатысты. Мамандар олардан сапа, сенімділік, сипаттама, дизайн және сатқан кездегі сервис пен сатқан соң техникалық қызмет көрсетуге қатысты пікірін сұраған.