Қытай билігі көліктің жылдам үдеуіне тыйым салады

Қытай қауіпсіздік деңгейін көтеру мақсатында автоөнеркәсіпке арналған жаңа ұлттық стандарт әзірлеп жатыр.

Қызу талқыланып жатқан ұсыныстардың бірі — қарапайым көліктің алғашқы жүздікті 5 секундтан жылдам еңсеруіне тыйым салу. Осылайша басшылар жол апатының санын азайтпақшы. Жергілікті баспасөз жүргізушілер автомобильдің толық қуатын арнайы режимде пайдалана алады деп жазды.

Шенділер кездейсоқ үдеуден де сақтандырмақшы. Олар тұрған немесе ақырын жүріп келе жатқан машинаның педалін кенет басқызбай, аудиовизуал ескерту жасайтын функция қосуды ұсынды.

Электрлі және гибрид модельдерге қатысты қосымша талаптар да шығады.

Электромобиль өндірушілер апатты жағдайда автомобиль жылдамдығы 150 миллисекунд ішінде кемінде 25 км/сағ-қа өзгерсе немесе қауіпсіздік жастығы ашылса, аккумуляторды өшіретін функция орнатады. Ұлттық стандартқа сәйкес электрокар аккумулятор ұяшықтарындағы ақауды (қызып кету) ерте ескертетін жүйемен жабдықталуы керек. Видео немесе ойын қосу функциясы жылдамдық сағатына 10 км-ден асқанда өшуге тиіс.

Қытай болашақта жергілікті көліктерге дерекқорды ашу мүмкіндігін береді, сонда борттық электроника биометрия арқылы жүргізушіде куәлік бар-жоғын анықтайды.

Жаңа ұлттық стандарт жобасы қоғам талқысына шықты. Билік қазір машинаға жасырын есік тұтқасын орнатуға тыйым салатын тағы бір жобаны қарап жатыр.