Қытайлық шағын хетчбэк әлемдік бестселлер атанды

Әлемдік электрокар және гибрид (NEV) нарығындағы ең танымал модель атағы Wuling Hongguang Mini EV хетчбэгіне бұйырды деп жазды CleanTechnica. Қазанда ол рекорд жаңартып, Tesla Model Y-ды ығыстырды. Ең танымал брендтер тізіміне жеті Қытай маркасы енді.

Қытайда бірнеше нұсқасы сатылып жатқан Wuling моделінің қазанда 61.5 мың данасы иесін тапты. Ал Model Y көрсеткіші— 53.3 мың. Басылым бұған АҚШ-та электрокроссоверге сұраныс төмендегені себеп болды деп санайды. Үшінші орынға Wuling Hongguang Mini EV сияқты шағын әрі арзан Geely Geome Xingyuan моделі жайғасты. Оның 44.2 мыңы өткен. Үздік ондыққа енген бұдан өзге машиналардың бәрі BYD концерніне тиесілі (жетінші сатыдағы Xiaomi YU7-ні ғана бұл топтан бөліп айтуға болады).

1 / 6

• 
• 
• 
• 
• 
• 

Wuling Hongguang Mini EV

Wuling Hongguang Mini EV

Tesla Model Y

Tesla Model Y

Geely Geome Xingyuan (Geely EX2)

Geely Geome Xingyuan (Geely EX2)

1 / 6

Tesla Model 3 рейтингте небәрі 14-сатыға жайғасып, 2022 жылы шілдеден бергі ең нашар нәтижесін тіркеді. Бірақ қаңтар мен қазан қорытындысы бойынша ол әлемдегі ең танымал электрокарлар тізімінде үшінші қатарда тұр — Model Y мен BYD моделіне ғана жол берген.

Қазан айында үздік брендтер көшін BYD, Geely және Wuling бастады. Бірақ концерннің қарқыны баяулай бастағаны байқалды. Топ-10 тізімге енген Қытайға қатысы жоқ маркалар — Tesla (4-орын), VW (6-орын) және BMW (9-орын). Сарапшылар Tesla көп жылдан кейін алғаш рет жүлдеден қағылғанын атап өтті. Wuling өз тарихында алғаш рет бір айда 100 мыңнан аса машина сатып отыр.

Әлемдегі NEV саудасы аймақтарға байланысты әркелкі екенін айта кеткен жөн. АҚШ-та мұндай машинаға сұраныс азайып жатса, Қытайда өсімі баяулай бастады. Ал Еуропа, Үндістан, Түркия және Латын Америкасында электромобильге қызығатындар көбейіп келеді. Қазанда әлемдегі автомобиль нарығында NEV үлесі 28 %-ға жетті.