Қытайда Li i6-ның бағасы белгілі болды

Li Auto жаңа электрокроссовер — i6-ны сата бастады. Ол батареялы модельдер қатарында кішісі. Базалық жинақта көлік бір электромотормен жабдықталады, екіншісі опция ретінде орнатылады. Li i6-ның бастапқы бағасы — 249 800 юань (19 млн теңге).

1 / 5

• 
• 
• 
• 
• 

1 / 5

Lixiang i6-ның сырт келбеті үлкен i8-ге ұқсас, тек бампері басқаша және шатыры артқы тіректерге қарай еңіс. Ұзындығы 4950 мм автомобильдің дөңгелек базасы — 3 метр. Шанақ өлшемі жағынан i8-ден 135 мм қысқа болса, базасы небәрі 50 мм қысқарған. Машина тек екі қатарлы салон алады, соның арқасында жүксалғыш көлемі 728 литрге жетті.

Базалық модификациядағы жалғыз мотор 340 ат күшін және 425 Нм момент береді, онымен кроссовер алғашқы жүздікті 6.5 секундта еңсереді, ең жоғары жылдамдығы — 180 км/сағ. 87.3 кВт·сағ батареямен жүріс қоры 720 шақырымға жетеді. 800 вольттық архитектураның арқасында 500 км-ге жететін энергия қорын 10 минутта толтыруға болады.

544 ат күшіне ие (660 Нм) толық жетекті экземпляр 269 800 юань (20.5 млн теңге) тұрады. Алғашқы жүздікті 5.4 секундта еңсереді, бірақ батарея сыйымдылығы өзгермегендіктен, екі моторлы кроссовер 660 шақырым жүріп өтеді.

1 / 4

• 
• 
• 
• 

1 / 4

Электрокардың салонына бірнеше экран орнатылған. Алдыңғы панельде 15.7 дюймдік екі тачскрин тұр, рөлдегі шағын дисплей аспаптар панелін алмастырады, алдыңғы әйнекке түсетін проекцияның өлшемі — 16.8 дюйм. Төбедегі 21.4 дюймдік экран артқы жолаушыларға арналған, бірақ ол ақылы опция. Қосымша ақы төлеп, 21 дюймдік дискілер мен ерекше шанақ түстерін таңдауға болады. Бастапқы жинақта пневмоаспа және тоғыз қауіпсіздік жастығы бар.