Қытайдың Өнеркәсіп министрлігі BYD концерні шығарған Yangwang U9 купесінің сертификат суреті мен кейбір техникалық сипаттамасын жариялады. Одан гиперкардың сериясы нұсқасы концептіден сәл өзгеше екенін көруге болады.
Марка Yangwang U9-дың базалық нұсқасына жаңарған аэродинамикалық элементтер орнатқан. Сондай-ақ гиперкар өзгеше жүзбеқанат және спойлермен ерекшеленеді. Шанақ бүйірі де өзгерген.
Сертификат суретінен жаңа шанақ элементтерін де көруге болады. Yangwang U9-да ірі диффузор болады. Бірақ оларды опция жинағы ретінде немесе үздік комплектацияға арнап ұсынуы мүмкін. Дөңгелек дискісінің бірнеше түрлі дизайн үлгісі бар.
Гиперкар жалпы 1305 ат күшіне ие төрт электромотормен жүреді. Машина алғашқы жүздікті 2 секундта еңсереді, ең жоғары жылдамдығы — 300 км/сағ. Жүз киловатт батареясы 700 шақырым жол жүруге мүмкіндік береді. Купенің ұзындығы — 4966 мм, дөңгелек базасы — 2.9 метр, бірақ салоны екі орынды ғана болады.
Сертификат құжаты BYD гиперкары сериялы өндіріске шығатынын білдіреді. Yangwang U9 өндірісі 2024 жылы басталады, бағасы миллион юаньнан (шамамен 64 млн теңге) кем болмайды.
Yangwang суббрендінің алғашқы моделі U8 болатын, оның моторы 1200 ат күшін береді. Алда топтамаға U6 седаны қосылады. Компания оны әлемдегі аэродинамикасы ең үздік седан деп атап жүр.
Комментариев: 0