Қытай электробустары қауіпсіз бе?

Дәстүрлі мотормен жүретін машинадан бас тартып, электрлі автобус паркін кеңейтіп жатқан Норвегия техниканың көбін Қытайдан алып отыр. Қазір елдегі 1300 электробустың 850-і — Yutong өнімі.

Биыл жазда елдегі ең ірі қоғамдық көлік операторы Ruter киберқауіпсіздік мәселесіне алаңдап, өз автопаркін жасырын тексерген. Атап айтқанда, техниканың саботаж мүмкіндігі сынақтан өтті, әсіресе сыртқы ақпарат көзімен автономды дерек алмаса алатын Yutong автобустары басты назарда болды.

Мұндай «қызметтік есік» бағдарламаны қашықтан жаңарту және техникалық ақауды жөндеу үшін қажет. Бірақ Ruter бұл схема қауіпті деп есептейді, өтйкені аккумулятор мен электр көзін басқаруға мүмкіндік алу автобустың барлық функциясын толық бақылауға, қажет болса оны толық өшіріп тастауға жағдай жасайды. Оған Yutong компаниясы ғана емес, бөгде тұлғалар да қол жеткізуі ықтимал.

Компания автобусты өндірушінің қашықтан өшіру қаупі төмен екенін атап өтті, мамандар маңызды инфрақұрылымдағы олқылықты тауып, оны жөндеуге ниетті. Ruter қолдағы электробустарды автономды жүйеге ауыстырып жатыр: модемнен SIM-картаны алып тастап, техниканы бұлттық жүйеден оқшаулайды деп жазды Aftenposten. Бұл бастаманы Норвегия үкіметі қолдап, киберқауіпсіздік бағытындағы жұмысты жалғастыруды ұсынды.

Бағдарламалық жасақтаманы алыстан жаңарту жүйесі Қытай электробустарында ғана емес, заманауи электрокарлар мен гибридтердің көбінде бар. Демек киберқауіпсіздік мәселесі олар үшін де өзекті.