Қытай билігі электрлі рөлі бар машина шығаруға рұқсат берді

Рөл мен дөңгелек арасында тікелей механикалық байланыс жоқ автомобильдер бұрыннан бар. Бірақ Қытай билігі қауіпсіздік үшін қосымша механикалық рөл орнатуды міндеттеп келді. Мұндай механизм Infiniti Q50-де бар.

Техникалық прогресс пен компаниялардың көлік құрылымындағы ескірген бөлшектен арылуға талпынысы нәтижесінде автомобильдің басқару жүйесіне арналған жаңа стандарт 2026 жылдың 1 шілдесінде күшіне енеді. Ол бұрынғы механикалық рөл орнатуды міндеттейтін талапты жояды, тиісінше толық электрлі рөл технологиясын пайдалануға жол ашады деп жазды IT Home.

Ережеде электрондық және электрлі басқару жүйесіне (SBW және EPS) арналған қауіпсіздік пен функционалға қойылатын толық талаптар жазылған. Оны әзірлеуге Nio, BAIC, Xpeng, BYD, Geely, Xiaomi және Huawei сияқты жергілікті компаниялардың мамандары, сонымен қатар Toyota мен Mercedes-Benz China-ның Қытайдағы технологиялық орталықтарының инженерлері қатысты. Құжат ISO 26262 секілді халықаралық стандарттарға сай болу үшін жаңа терминдер мен тексеру әдістерін енгізеді.

Елде толық электрлі рөлмен жабдықталған премиум көліктер бұрын болған, бірақ енді мұндай машиналар барлық сегментке шығады. Техникалық қызмет көрсету саласы және жеке ТЖО бұған біртіндеп қайта бейімделуге мәжбүр.