Қазақстанға Қытайдан экокласы төмен жүк көліктері заңсыз кірген

Астанада Қытайдан FAW маркалы 20 жүк көлігін заңсыз әкелген үш адам сотталды. ҚР Бас көлік прокуратурасының баспасөз қызметі хабарлағандай, жүк көліктері Қазақстанға 2023 жылы ақпаннан мамырға дейін «Нұр Жолы» және «Бақты» кеден бекеттері арқылы кіріпті. Бұл машиналардың экологиялық класы Еуро-2 санатына жатады, бірақ кеденде Еуро-5 стандартына сай техника деп рәсімделген.

«Көліктердің кедендік құны — 285 млн теңге. Кейін техника коммерциялық құрылымдар арқылы мемлекеттік сатып алу аясында Қазақстан жолдарын күтіп ұстайтын „ҚАЖсервис“ мекемесіне 605 млн теңгеге сатылған», — деп хабарлады прокуратура.

Сот үш айыпталушыны алдын ала сөз байласу арқылы адамдар тобымен бірге аса ірі мөлшерде экономикалық контрабанда жасағаны үшін кінәлі деп таныды. Сотталушылар контрабанда нысанының құны — 285 млн теңгені мемлекетке қайтаруы қажет. Үкім заңды күшіне енген жоқ.

Прокуратура контрабандаға қатысқан азаматтарға нақты қандай жаза тағайындалғанын айтпады. Ал Қылмыстық кодекстің 234-бабына сәйкес мұндай әрекет жасаған адамға 5000 АЕК-ке дейін (биыл 21 625 000 теңге) айыппұл салу, 800 сағатқа дейін қоғамдық жұмысқа тарту, үш жылға дейін бас бостандығын шектеу немесе дәл осы мерзімге бас бостандығынан айыру жазасы беріледі.