Ескі көлікті қашан өткізуге болады

Экология министрлігі ескі автомобилін утилизацияға тапсырғандарға берілетін жеңілдік сертификатын ұсыну ережесін қабылдап, жариялады. Құжат 2026 жылы 25 қазанда күшіне енеді. Онда мынадай нормалар бар:

• сертификат көлік құралының категориясына қарамастан, кез келген санаттағы көлік пен ауыл шаруашылығы техникасын жеңілдікпен сатып алуға мүмкіндік береді;
• сертификатқа автоматты түрде бірегей нөмір беріледі;
• құжат пен оның иесі туралы ақпаратты оқуға мүмкіндік беретін цифрлы код (QR-код) болады;
• бір автомобиль үшін бір ғана жеңілдік сертификаты беріледі;
• бір машина алуға екі сертификатты, бір ауыл шаруашылығы техникасын алуға төрт сертификатты біріктіруге болады;
• жеңілдік беретін өндірушілердің тізімін «Жасыл даму» АҚ дайындап, компанияның интернет-ресурсына (www.recycle.kz) жариялайды.

Жеңілдік мөлшерін Өнеркәсіп министрлігі автоөндірушілермен талқылап, сертификат құнын Экология министрлігі бекіткен. 2026 жылы сертификат бағасын мынадай етіп белгілеу туралы шешім қабылданды:

• M1 категориясына жататын жеңіл автомобиль үшін — 315 мың теңге;
• M2 категориясына жататын автобус үшін — 550 мың теңге;
• N1 және N2 категориясына жататын жүк көлігі үшін — 550 мың теңге;
• M3 категориясына жататын автобус үшін — 750 мың теңге;
• N3 категориясына жататын ауыр жүк көлігі үшін — 750 мың теңге.

Бірақ Экология министрлігі халықтан ескі көлік қабылдау процесі нақты қашан басталатынын айта алмай отыр.

«Қазір „Жасыл даму“ АҚ қайта өңдеу (утилизация) қызметін көрсету жөнінде шарт жасауға дайындалып жатыр», — деп хабарлады министрлік. Бірақ экология саласындағы шенділер мұны бірнеше жылдан бері айтып келеді. Ал «Жасыл даму» байланыс орталығының операторы Kolesa.kz редакциясына 25 қазаннан бастап ескі көлік қабылдау жоспарда жоқ деді. Компания қызметкерлерінің сөзінше бұл бағыттағы жұмысты толық іске қосу үшін қандай да бір құжаттарды қабылдау қажет екен.

Қазақстанда утилизация 2021 жылы тоқтаған. Содан бері түрлі бұйрық шығып, ережелер өзгергенімен, ескі техниканы қабылдап, орнына ақша немесе жеңілдік сертификатын беретін бағдарлама қайта іске қосылмады.