Қазақстандағы үш жаңа трасса Азия мен Еуропаны жалғайды

Бүгін Телекөпір барысында мемлекет басшысы Қызылорда — Сексеуіл, Ұлғайсын — Сексеуіл және Бейнеу — Сексеуіл автожолын салу және жөндеуден өткізу жұмысы басталғанын хабарлады. Ақорданың баспасөз қызметі хабарлағандай, президент ұзындығы 800 км болатын жаңа Бейнеу — Сексеуіл автомагистралін салу жобасы басталғаны туралы айтты. Президент бұл трасса өңіраралық қатынасты қамтамасыз етумен қатар, негізгі халықаралық көлік желісіне айналатынын атап өтті.

— Осы жол ел аймақтары арасындағы байланысты нығайта отырып, Қытай мен Еуропаны жалғайтын «алтын көпір» ретінде қызмет етеді. Бұл жоба Қытай шекарасындағы өткізу бекеттерін Ақтау, Құрық порттарымен тікелей байланыстырады. Соның нәтижесінде Қытайдан Еуропаға дейін жүк тасымалдау ұзақтығы 1000 шақырымға, ал жүк жеткізу мерзімі 3 тәулікке дейін қысқарады. Халқымыздың таным-түсінігінде құдық қазу, көпір салу сауапты іс саналады. Осы тұрғыдан алып қарасақ, біз игілігі баршаға ортақ, яғни өзіміз де, өзгелер де пайдасын көретін аса жауапты жұмысты бастап отырмыз. Бейнеу — Сексеуіл бағыты республикалық, аймақтық, құрлықтық деңгейдегі маңызды жол болары анық. Сондықтан бұл жолды «Арал-Каспий магистралі» деп атаған дұрыс, — деді Қ. Ж. Тоқаев.

Президент ұзындығы 774 км болатын Қызылорда — Сексеуіл және Ұлғайсын — Сексеуіл трассасын кеңейту және кешенді жөндеуден өткізу жұмысы басталғанын мәлімдеді. Жобаны жүзеге асырумен отандық компаниялар айналысады, құрылыс 10 мыңнан аса адамды жұмыспен қамтамасыз етуге мүмкіндік береді. Магистральдар салынып болған соң жүк тасымалы 2.5 есе артып, жылына 13.2 млн тоннаға жетеді.

— Бүгін бастау алып жатқан жұмысты бекітілген мерзімде — 2029 жылдан кешіктірмей аяқтау өте маңызды. Қажет жағдайдың барлығы жасалып жатыр. Енді білек сыбана жұмысқа кірісу керек. Біз бір ел болып, бұл міндетті ойдағыдай жүзеге асырамыз деп сенемін! — деді президент.

«ҚазАвтоЖол» ҰК" АҚ хабарлағандай, «Бейнеу — Сексеуіл» жобасы аясында 800 шақырымдық жаңа автожол салынады. Ал «Қызылорда — Сексеуіл» жобасы бойынша 462 шақырым жолды қайта жөндеп, жолақ санын екіден төртке көбейтеміз әрі оның техникалық категориясын бірінші санатқа жеткіземіз. «Ұлғайсын — Сексеуіл» жобасы аясында 312 км трасса жөндеуден өтіп, төрт жолақты болады, техникалық категориясы бірінші санатқа жетеді.

«Бейнеу — Сексеуіл» және «Қызылорда — Сексеуіл» жобасы халықаралық DBM (Design — Build — Maintain) моделі бойынша жүзеге асады. Бұл модельге сәйкес мердігер жолды жобалау, салу және оны жеті жыл күтіп ұстауға жауапты болады. Бұл тәсіл жолдың сапасын жақсартып, оны тиімді пайдалануға жол ашады.