Қазақстан -— АВТОВАЗ үшін негізгі экспорттық нарық. Бірақ «Бипэк Автоға» қатысты мәселе Lada сатылымын айтарлықтай төмендетті. Дегенмен бұл автоөндірушіге кедергі болмады. Енді ресейлік брендтің бірнеше тәуелсіз дилері болады. Олардың алғашқысы — Aster қазірдің өзінде Қазақстанның 10 қаласында орталық ашып, көлік құнын жариялады.
Бағалар тізіміне қарасаңыз Lada арзандағандай көрінуі мүмкін. Шын мәнінде олай емес. Тізім арзан нұсқалардан басталады. Мәселен, Granta седанын 3,9 миллион теңгеге сатып алуға болады. «Бипэк Автода» баға 4,15 миллион теңгеден басталатын. Бірақ мұқият қарасаңыз бұл ақшаға Standart нұсқасы сатылып жатқанын аңғарасыз. Ал Classic 4,15 миллион теңге тұрады. Оның жаңа салондардағы бағасы — 4,2 миллион.
Vesta-ның да жағдайы осыған ұқсас. Бір қарағанда седан 300 мыңға арзандаған сияқты. Өйткені ол үшін 5,25 млн емес, 4,9 млн сұралады. Іс жүзінде Classic/Start жиынтығындағы Vesta-ның бағасы 70 мың теңгеге қымбаттап, 5 миллионға жеткен. Бірақ «Бипэк» Vesta-ның екі нұсқасын ғана ұсынатын, ал жаңа салондарда бес нұсқасы бар.
Шынымен арзандаған модельдер де бар. Бес орынды Lada Largus (Luxe) 270 мың теңгеге арзандап, 5,3 миллион болды. Дәл сол нұсқадағы жеті орынды машинаның құны 5,87 миллионнан 5,44 миллионға төмендеді. Ал Classic жиынтығындағы Lada Niva Legend бағасы небәрі 10 мың теңгеге түсті.
Айта кетейік, қазір Қазақстанда емес, Ресейде құрастырылған машиналар сатылып жатыр. Брендтің еліміздегі өндірісі басталған соң баға қайта өзгеруі мүмкін. Наурыздың соңында АВТОВАЗ Қостанайдағы «СарыарқаАвтоПром» зауытымен серіктестік орнатты. Енді онда Lada көліктері шығарылады. Алдымен Lada Niva Travel моделін құрастыру қолға алынды (бұрынғы Chevrolet Niva).
Комментариев: 0