Қазақстанда адам зардап шеккен жол апаты бір жарым есе өсті

2025 жылдың алғашқы алты айында елімізде 15 698 жол апаты болған. Бұл былтырғы осы кезеңмен салыстырғанда 54 % көп. Бас прокуратураның Құқықтық статистика және арнайы есепке алу жөніндегі комитетінің есебінше жартыжылдықта 22 346 адам зардап шеккен, оның ішінде 955-і қаза тапқан.

Жол апаттарының ең көбі (1401) республикалық маңызы бар трассаларда болған. 3 146 адам зардап шекті, оның 2 791-і жараланып, 355-і көз жұмды.

Апат саны бойынша Алматы (404), Ақмола (126) және Жамбыл (121) облыстары көш бастап тұр. Бұған дейін көлік саны көп Алматы қаласында ең көп жол апаты тіркелетін. Прокуратура тек адам зардап шеккен апаттарды есептейді. Бірақ адам көбіне жоғары жылдамдықпен жүрген көліктің соқтығысуы кезінде ауыр жарақат алады. Алматыдағы кептелістің кесірінен ондай жағдай сирек кездеседі. Осылайша жылдамдықты асырып, белгі мен таңбаға бағынбайтын жүргізушілер үшін аймақтық трассалар алға шығып отыр.

Прокурорлардың есебінше жол апаттарының басым бөлігін жеңіл көлік жүргізушілері жасаған. Олардың үлесінде 12 046 апат. Автобустар — 520, мопедтер — 438, жүк көліктері — 390 жол-көлік оқиғасына қатысқан.

Ереже бұзған жаяу жүргіншілер — 428, велосипед жүргізушілері — 114, жеке мобильділік құралын тізгіндегендер — 58, электросамокатшылар — 48 жол апатына себеп болған.

Апат кезінде жарақат алған балалардың көрсеткіші де 2024 жылдың осы кезеңімен салыстырғанда 74.3 % артқан (3 185-тен 5 552-ге дейін). Қаза болғандардың саны да 71 % көбейіп, 126-дан 215-ке жеткен.

Қайтыс болғандар саны бойынша Түркістан облысы (27), Алматы облысы (17), Жамбыл (9) және Жетісу (9) облыстары тізімнің басында тұр.

Бір қызығы, бір жыл бұрын прокуратура Қазақстанда зардап шеккендер болған жол-көлік оқиғасы күрт артқанын хабарлаған еді. Биыл жолдағы жағдай одан әрі нашарлағанын көруге болады.