Кейінгі жылдары елдегі заң шығарушылар жол ережесін бұзатындарға қойылатын талаптарды кезең-кезеңмен күшейтіп келеді. Олар орташа жылдамдықты өлшеу жүйесін енгізді, жолдарда жүргізушілерді тек стационарлық камера емес, жасырын патруль мен жедел жәрдем көліктеріне орнатылған кешен де бақылайды. Билік мопедті тіркеуді міндеттеді. Автомектептерде лицензия беру жүйесін қайта енгізу арқылы жүргізушілерді даярлау кезеңіндегі бақылау күшейді. Бас прокуратура мұндай шаралар өз нәтижесін бере бастады дейді.
2026 жылдың алғашқы жартыжылдығының статистикасына сәйкес жол апатынан қаза тапқандар саны 955-тен 807 адамға дейін, яғни 15.5 % азайған. Зардап шеккендер саны 6 % төмендеп, 22 346 адамның орнына 21 007 адамды құрады. Соған қарамастан жол-көлік оқиғаларының жалпы саны әлі көп. Жыл басынан бері 15 188 жол апаты болған. Оның жартысынан астамын жол ережесін өрескел бұзған жүргізушілер жасаған.
Прокурорлар көбінесе жылдамдықты шамадан тыс асыру және маневр жасау ережесін сақтамау жол апатына себеп болады деді. Мұндай жол апаттарынан 8 мыңнан астам адам зардап шегіп, 676 адам қаза тапқан.
Сол себепті қазір жол ережесін үнемі бұзатын жүргізушілерді Әкімшілік кодекстің 434-бабы (Ұсақ бұзақылық) бойынша жауапкершілікке тарту тәжірибесі кеңінен қолданылып келеді. Бұл бап бойынша 30 тәулікке дейін әкімшілік қамауға алу жазасы қарастырылған. Жыл басынан бері полиция 29 адамды мұндай жазаға тартқан.
Бас прокуратура айып балын енгізуге қатысты пилоттық жоба туралы айта кетті. Жүйе толыққанды қашан іске қосылатыны белгісіз, бірақ оны жүзеге асыру жұмыстары Ішкі істер министрлігімен бірлесіп Құрылтай алаңында жалғасады деді.
Комментариев: 0