«ҚазжолҒЗИ» Қазақстан жолдарында температура мен ылғал деңгейін өлшейтін 28 сезгек (датчик) жиынтығы орнатылғанын хабарлады. Автоматты мониторинг жүйесі біздің ел үшін арнайы әзірленген.
Асфальт астына орнатылған сезгек жолдағы су-жылу режимінің өзгеру динамикасы туралы сағат сайын мәлімет беріп отырады. Соған сүйеніп институт қызметкерлері жылдың жылы және суық мезгілінде жол құрылымы температурасы мен ылғалдылығының өзгерісін және елдің әр аймағындағы жолдардың қату тереңдігі мен ұзақтығын зерттейді. Сезгектер күн батареясымен жұмыс істейді.
Зерттеу нәтижесі бойынша қату тереңдігі картасы жасалып, жазда түрлі климат жағдайында жолда шұңқыр пайда болу процесінің заңдылығы анықталады.
Сондай-ақ алынған ақпарат дұрыс жобалау шешімін жасауға және жол қауіпсіздігі мен жолды пайдалану мерзімін ұзартатын қажетті шара қабылдауға мүмкіндік береді, — деп атап өтті ҚР ИИДМ Автомобиль жолдары комитеті.
Былтыр президент Қасым-Жомарт Тоқаев елдегі жол сапасын сынаған. Биыл Алматы облысында 454 шақырым жергілікті маңызы бар жол, ал Жамбылда 230 шақырым облыстық, 59 шақырым аймақтық маңызы бар жол жөнделеді.
Комментариев: 0