Қазақстанда жол сапасы аяқ астынан жақсарып кетті

«Жыл қорытындысы бойынша Маңғыстау (95 %), Жамбыл (95 %) және Алматы (91 %) облысында жергілікті маңызы бар жолдардың жағдайы жақсы екені анықталды, ал БҚО (39 %), Ақтөбе (66 %) және Атырау (70 %) облысы керісінше нашар нәтиже көрсетті», деп хабарлады ҚР ИИДМ Автомобиль жолдары комитеті.

Бірақ биыл тамызда ҚР индустрия және инфрақұрылымдық даму министрі Қайырбек Өскенбаев басқаша мәлімет берген. Сол кезде министр жариялаған жол сапасы нашар өңірлер тізімі мынадай еді:

• Шымкент қаласы — 71 % нашар жол;
• Маңғыстау облысы — 61 %;
• Алматы қаласы — 56 %;
• Шығыс Қазақстан облысы — 49 %;
• Батыс Қазақстан облысы — 43 %;
• Түркістан қаласы — 40 %.

Демек жазда министр атаған облыстар арасында БҚО-да ғана жол сапасы нашар болып шықты. Ал Қ. Өскенбаев тізген антирейтингте екінші орында тұрған Маңғыстау облысында жақсы жолдар үлесі күтпеген жерден 95 %-ға жетіп отыр. Айналасы үш айда Шымкент, Алматы және Түркістанда да жол жақсарып кетіпті.

ҚР ИИДМ АЖК Kolesa.kz редакциясына бүгін жарияланған санды мәлімет дұрыс екенін хабарлады. Шенділер жергілікті жолдар жайлы, ал министр жазда республикалық трассалар туралы айтыпты. Ендеше істің ақ-қарасын маңғыстаулық жүргізушілерден сұрайық: сіздерде жол сапасы шынымен керемет пе?