2024 жылғы 24 сәуірден бері қарыз мөлшері несиеге жаңа автомобиль алғанда ғана ескерілетін. Бірақ биыл 20 ақпаннан бастап банктер мен микроқаржы ұйымдары қарызын төлей алмай жүрген азаматтарға және ескі көлік алатындарға несие рәсімдей алады.
ҚР Қаржы нарығын реттеу және дамыту агенттігінің қаулысы бойынша «2025 жылғы 1 қаңтардан 2026 жылғы 31 желтоқсанға дейін несие берген кезде қарыз жүктемесі коэффициенті есепке алынбайды:
- сол машинаны несиеге кепіл ретінде қойып, жүрмеген әрі Қазақстанда алғаш рет тіркеліп жатқан жаңа автомобиль алғанда (былтыр сәуірде қолданысқа енген норма. — Kolesa.kz ескерт.);
- сол машинаны несиеге кепіл ретінде қойып, 50 % мөлшерінде алғашқы жарна төлеп, жүрген автомобиль алғанда;
- сол машинаны несиеге кепіл ретінде қойып, 30 % мөлшерінде алғашқы жарна төлеп, шыққанына үш жыл толмаған автомобиль алғанда».
Құжатты әзірлеушілер бұл қадамға отандық автоөнеркәсіпті қолдап, жеңілдікті автонесие шартымен автомобиль сату мақсатында барғанын айтты. Бірақ қаулы мәтінінде машинаның шыққан жері туралы нақты талап жоқ. Демек тұрғындар кез келген елде шыққан автомобильді несиеге ала алады. Ең бастысы, алғашқы жарна төлеу керек.