Шараның негізгі мақсаты — қала аумағын көріктендіру ережесін бұзудың алдын алу және оны болдырмау, өзгенің мүлкін ұрлықтан сақтау және қаланы абаттандыруға жауапты аудандық бөлім мамандарымен, ПИК қызметкерлерімен бірлесе отырып, иесіз қалған көліктерді анықтау мақсатында аулаларды тексеру, — деп Алматы қалалық Полиция департаментінің баспасөз қызметі хабарлады. Полицейлердің айтуынша, шара басталған алғашқы күні-ақ олар қараусыз қалған 15 автокөлікті тауыпты.
— Иесіз көліктерді анықтаған жағдайда оларды арнайы тұрақтарға эвакуациялау шарасы жүргізіледі. Алматы қаласының аумағын көріктендіру Ережесінің 16-тармағына сәйкес, бөлшектенген көлік құралдарының осыларға арнайы бөлінген тұрақтардан басқа жерлерде тұруына рұқсат етілмейді. Бұған жол берілген жағдайда әкімшілік заңнамада ҚР ӘҚБК-нің 505-бабына («Қалалар мен елдi мекендердiң аумақтарын абаттандыру қағидаларын бұзу») сай жауапкершілік қарастырылған, — деп Алматы қалалық Полиция департаменті Жергілікті полиция қызметі басқармасының басшысы Төрехан Исин мәлімдеді.
Алматы полициясы ел азаматтарының иесіз қалған көліктерді байқаған жағдайда «102» нөміріне хабарлауын сұрайды.
ҚР ӘҚБК бойынша, абаттандыру ережелерін бұзу алғашында ескерту немесе жеке тұлғаларға 20 АЕК, шағын кәсіпкерлік субъектілері мен коммерциялық емес ұйымдарға 30 АЕК, орта кәсіпкерлік субъектілеріне 40 АЕК, ірі кәсіпкерлік субъектілеріне 100 АЕК көлемінде айыппұл салуға әкеп соғады. Мұндай әрекет бір жыл ішінде қайталанса, салынатын айыппұл көлемі анағұрлым көп болады.
Комментариев: 0