Қандай жағдайда көлікті тексеру керек екені тіркеу ережесінде нақты жазылмаған. 50-тармақта техникалық құжатқа және тіркеу жүйесіне өзгеріс енгізерде қажет құжаттар тізімінде салыстыру актісі мүлде жоқ. Мысалы, шанақ түсін өзгерткенде көлік иесі мамандандырылған ХҚКО-ға жеке куәлік, техникалық құжат және салық төленгенін растайтын түбіртек өткізуі тиіс.
Ал ереженің 51-тармағында «Деректерінде айырмашылық бар тіркеу жүйесі мен көлікті тіркеу туралы куәлікке өзгеріс енгізу ІІО берген қорытынды негізінде іске асады» деп жазылған. Алайда ережеде «тіркеу деректері» деген түсінікке қатысты нақты анықтама берілмеген. Сондықтан арнайы орталықтағы мамандар бұл норманы өз қалауынша қолданады. Мысалы, көлік иелеріне қызмет көрсететін кейбір мекемелердегі мамандар шанағының түсі ауысқан көлікті тексеріске жіберуге тырысады.
Kolesa.kz Ішкі істер министрлігінен қандай жағдайда көлікті тексерістен өткізу қажет екенін түсіндіруді сұрады. Ресми жауабында мекеме өкілдері былай жазған: «Тіркеу ережесінің 51-тармағы автокөліктің тіркеу деректері (VIN-код, қозғалтқыш нөмірі, шасси нөмірі, қозғалтқыш көлемі, отыратын орын саны) бірыңғай ақпараттық жүйе мен көлік құралын тіркеу туралы куәлікте көрсетілген деректерден өзгеше болғанда оны өзгерту тәртібін реттейді». Басқаша айтқанда, көлік шанағының түсі не көлік иесінің тегі ауысқанда темір тұлпарды тексерістен өткізудің қажеті жоқ!
Өзге елден жекелеп әкелген машинаны алғаш тіркегенде ол міндетті түрде тексеріледі.
Ал заңнамада қаралмаған құжаттарды талап ететін шенділерге шағымыңыз болса, «Азаматтарға арналған үкімет» басшылығы мен жергілікті әкімшілік полицияға жүгініңіз.
Комментариев: 0