Мемлекет басшысы 1 қыркүйектегі Жолдауында шетелде тіркелген көліктерді заңдастыру туралы айтты. Президент 2022 жылғы 1 қыркүйекке дейін елге келген машиналарды заңды есепке қоюды ұсынды.
Ішкі істер министрлігі Қасым-Жомарт Тоқаевтың бастамасын қалай іске асыруды қарастырып жатыр. ҚР ІІМ ӘПК төрағасының міндетін атқарушы Жандос Мұратәлиевтің айтуынша жауапты мекеме заңнамаға тиісті өзгеріс енгізбекші. 1 қыркүйектен кейін елге кірген техниканы заңдастыруға жол бермеу үшін Ішкі істер органы, Мемлекеттік кірістер комитеті және шекарашылар өзара ақпарат алмасады.
Мұратәлиев Қазақстанда қанша машина тіркелуі мүмкін екенін айтпады, бірақ жеңілдікпен заңдастыру шарты қандай көлікке қолданылмайтынын түсіндірді.
— Биыл 1 қыркүйектен кейін Қазақстанға келген автомобильден бөлек, қылмыстық істер бойынша іздеуде жүрген, бұрын тіркелген елде заңды тәртіппен есептен шықпаған, басқару элементі оң жақта орналасқан, сондай-ақ кедендік ресімдеуден толық өтпеген немесе иесінде тіркеу және құқық белгілейтін құжаты жоқ машиналар заңдастырылмайды", — деді Жандос Мұратәлиев.
Шенділер Қазақстанда тіркелетін барлық шетелдік көлікті бұрын есепте тұрған елдің құқық қорғау және кеден органының деректер базасымен салыстырып тексереді.
Комментариев: 0