Дүниежүзілік жылдамдықты қадағалайтын камералар базасынан алынған мәлімет бойынша 107 елде 105 633 бақылау кешені орнатылған. Алайда ұйым сайтында жарияланған мәліметтің дұрыстығы күмән тудырады.
Шетелдік сарапшылар Қазақстан жолдарында 265 жылдамдық өлшегіш бар деп топшылаған. Бірақ бір ғана Алматыда былтыр 460 «Сергек» кешені мен 2284 камерасы қызмет етті, ал республика бойынша оның саны 13 мыңнан асады. Бес есе айырмашылық есептен жаңылған болар деуге келмейді. Сондықтан жылдамдық өлшегіш түсінігі әр елде әртүрлі болуы мүмкін деген ой келеді немесе олар берген мәлімет мүлде дұрыс емес.
Қалай болғанда да, елдегі ең ірі шаһарда электронды-оптикалық құрал саны тым көп. Ал одан үлкен әрі халық тығыз қоныстанған Мәскеуде үш жарым мыңға жуық, бүкіл Ресейде 20 мыңнан аса жолдағы қозғалысты бақылау кешені бар екен. Бұл РФ ІІМ Жол қауіпсіздігі ғылыми орталығы берген мәлімет. Демек біздің елде әр автомобильге шаққандағы жылдамдық өлшегіш саны рейтингте көш бастап тұрған Ресейден әлдеқайда көп.
Негізі тізімнің басында Қытай тұрса, ақпарат сенімдірек болар ма еді. Бірақ аспан асты елі жолдағы камера санын құпия сақтап отыр.
Комментариев: 0