Бас прокуратураның Құқықтық статистика және арнайы есепке алу комитеті Kolesa.kz редакциясына 2024 жылғы жол апатының статистикасын ұсынды. Мекеме есебі бойынша Шымкент — Тараз — Алматы — Қорғас халықаралық А-2 тас жолы былтыр нағыз «өлім жолына» айналған, онда 685 апат болыпты. Трасса Алматы, Түркістан және Жамбыл облысы аумағынан өтеді. Бір жылда онда 134 адам ажал құшқан. Прокурорлар тас жолдағы оқыс оқиғаның жартысы — жылдамдық асырғаннан, қалғаны түнде және ымыртта болғанын айтты.
Комитет Қазақстанда жыл сайын орта есеппен 1.5–2 мың азамат жол апатынан көз жұматынын, олардың орташа жасы 20-45 жас екенін атап өтті. Былтыр республикада 31.5 мыңнан аса оқыс оқиға болып, 2.5 мың адамның өмірін қиған. 40 мыңнан аса тұрғын жарақат алды.
Кісі өлімімен аяқталған жол апатының 61 %-ы қала сыртындағы трассаларда тіркелген. Мұндай ауыр жол-көлік оқиғасы Алматы (210 ЖКО, 271 адам қаза тапты), Түркістан (142 ЖКО, 182 адам қаза тапты) және Жамбыл (127 ЖКО, 189 адам қаза тапты) облысында көп болған. Қайғылы жағдайдың 2275-іне көліктердің соғылуы, 1393-іне аударылып кетуі себеп болған.
Прокуратура өкілдері таксиcтерді ерекше атап өтті. Олар ұйықтамай, демалмай жұмыс істейді. Күнделікті медициналық тексерістен өтпейді. Көліктің техникалық жағдайы да ескерусіз қалып отыр, машина тәулік бойы тоқтамай жүреді, дөңгелегі маусымға сай ауысты ма, жоқ па, бақылау жоқ. 2024 жылы таксистер қатысқан 113 апат болып, 42 адам көз жұмған, тағы 201 азамат жараланды.
Прокурорлар бұл зерттеуде ресми жұмыс істейтін таксистерді ғана есепке алған. Бірақ қазір қалааралық жолдарда тіркелмеген таксистер мен шетелдік жүргізушілер жолаушы тасып жүргені жасырын емес. Сарапшылар «өлім жолы» деп атаған Шымкенттен Қорғасқа дейінгі трассада осындай жасырын таксистер көп жүреді.
Бас прокуратура әр жолаушы таксиге тапсырыс бергенде, әсіресе қалааралық сапарға шығарда машина мен жүргізушінің жағдайына мән беріп, жүргізуші куәлігі, техбайқау картасы, сақтандыру полисі және дөңгелегі маусымға сай келетін-келмейтініне назар аударса, жүргізушілер тәртіпке бағынып, бәрі ретке келеді деп санайды. Сіздің ойыңызша, бұлай істеу мүмкін бе?
Комментариев: 0