2025 жылы жол апатынан 250 мыңнан аса көлік бүлінген

ҚР Бас прокуратурасының мәліметінше 2025 жылы Қазақстанда 36 146 жол апаты (2024 жылмен салыстырғанда 14.4 % көп) тіркелген, оның 1796-сы кісі өліммен аяқталыпты (2024 жылғы көрсеткіштен 7.9% аз). Қаза тапқан адам саны 9.7 % азайып, 2331 болды. Былтыр 51 561 адам жарақат алды (2024 жылмен салыстырғанда 18.6 % көп).

Апаттың нақты саны бұдан әлдеқайда көп екені анық. Өйткені прокурорлар кісі өлімі болған және адам жарақат алған апатты ғана есепке алады. «Евразия» сақтандыру компаниясының аналитиктері Бірыңғай сақтандыру дерекқорынан алған дерекке сүйене отырып хабарлағандай, сақтандыру төлемінің саны прокуратура хабарлаған апат санынан 3.83 есе көп. Статистикадағы ең үлкен айырмашылық Астанада тіркелген — 10.06 есе, ал ең азы Маңғыстау облысында — 1.45 есе. Деректегі айырмашылық қанша үлкен болса, аймақта болған ауыр апаттың саны сонша көп екенін білдіреді.

Сақтандырушылардың мәліметіне сүйенсек, 2025 жылы сақтандыру компаниялары міндетті сақтандыру аясында жол апатына түскендерге 139 585 төлем жасаған, бұл бір жыл бұрынғы көрсеткіштен 6.1 % жоғары. Төлемнің кейбірі 2024 жылы тіркелген апат үшін төленіпті. Бірақ былтыр болған кей апат үшін төлем 2026 жылы жасалатынын ескерген жөн. Демек 139 585 сақтандыру төлемі былтыр Қазақстанда болған жол апатының нақты санын көрсетеді. Бірақ бұл есепке жүргізушілер оқиға орнында өзара келісіп, шешіп кеткен оқиғалар кірмейді.

«Евразия» СК сарапшылары 2025 жылы сақтандыру төлемінің саны бойынша Алматы (22 410 төлем) Астанадан (20 867) асып түскенін атап өтті. Елорда бұл көрсеткіш бойынша бірнеше жыл қатарынан көш бастап келген. Ал Алматы облысы (12 697) тағы үшінші орынға жайғасты.

Сақтандырушылар бүлінген мүлік (жеңіл автомобиль, жүк көлігі, тіркеме, автобус, мотоцикл, сондай-ақ бағана мен қоршау) үшін жалпы 137 797 төлем жасаған. Ал зардап шеккен жүргізуші, жолаушы және жаяу жүргіншілерге, көз жұмған кісінің туыстарына 1788 төлем жасады.

Еуропротокол тәртібі енген соң елде жеңіл жол апатын тіркеу көрсеткіші артты, оны Астана, Ақтөбе және Қарағанды жүргізушілері көп пайдаланыпты. 2025 жылы сақтандырушылар жеңілдетілген тәртіп бойынша тіркелген жол апаты үшін 26 532 төлем жасаған, бұл 2024 жылға қарағанда 119.5 % көп. Бұған таңғалудың қажеті жоқ, өйткені Қазақстанда Еуропротокол 2024 жылы ғана күшіне енді. Жүргізушілер бұл тәсіл тиімді екенін енді ғана түсініп, 2025 жылдан бастап белсенді қолданып жатқан сияқты.

«Жол апатына кем дегенде екі автомобиль қатысатынын ескерсек, жыл сайын кемінде 280 000 машина апатқа түседі (автопарктің 4.7 %-ы). Демек елдегі көліктердің бір жылда апатқа ұшырау ықтималдығы шамамен 20-дан 1-ге тең деген сөз. Яғни Қазақстандағы әрбір жиырмасыншы машина жол апатына түскен» деді «Евразия» СК мамандары.