ҚР Бас прокуратурасы елдегі автожол саласын тексеріп, қорытынды шығарды. Мекеменің баспасөз қызметі хабарлағандай, прокурорлар 300-ден аса заңсыз әрекетті анықтап, орынсыз жұмсалуы мүмкін 30 млрд теңге бюджет шығынын үнемдеді, 2.5 млрд теңге қазынаға қайта түсті, 29 қылмыстық іс қозғалып, 305 тұлға тәртіптік және әкімшілік жауапқа тартылды.
Прокуратура заң бұзу әрекеті мен бюджет қаражатын жымқыру схемасын белгілі бір мердігер ұйымдар жиі жасайтынын айтады. Мысалы, осындай фирмалардың бірі Ақмола облысы Қоянды ауылындағы жергілікті маңызы бар жолды жөндеуге 907 млн теңге алып, жұмысты орындамаған. Қазір бұл келісімшарт бұзылды, аймақ прокуроры қылмыстық әрекеттің мән-жайын анықтап жатыр.
Солтүстік Қазақстан облысында жол жөндеуге бөлінген 423 млн теңгені жымқырды деген айыппен Ғ. Мүсірепов атындағы аудан әкімдігінің басшылары мен жергілікті мердігер ұсталып, сотқа тартылды. Шығыс Қазақстан облысы Алтай ауданында шенділер бұрын жөнделген жолға 148 млн теңге бөлмек болған, бұған кінәлі лауазымды тұлға тәртіптік жаза арқалады. Ал Ақмола облысында Екатеринбург — Алматы тас жолынан Берсуат ауылына дейінгі бөлікті жөндеуге 1.1 млрд теңгенің заңсыз келісімшартын жасаған Аршалы ауданы әкімдігінің бөлім басшысы жұмыстан босатылды.
«Жолдың сапасыз салынуына орынсыз жоспар, инновация енгізбеу, сапалы материалды аз қолдану және т.б. себеп болып отыр. Осыған орай Бас прокуратура үкіметке басқа елдердің тәжірибесіне сүйене отырып автожол саласын түбегейлі өзгерту туралы ұсыныс енгізді», — деп мәлімдеді Бас прокуратура.
Бұған дейін ҚР Бас прокуратурасы «Қазавтожол» ҰК АҚ, Автомобиль жолдары комитеті және жергілікті әкімдіктердің қызметін тексеру барысында 43.4 млрд теңге ұрланғанын анықтаған болатын.
Комментариев: 0