«Қазавтожол» ҰК АҚ, Автомобиль жолдары комитеті мен жергілікті әкімдіктердің қызметін тексерген Бас прокуратура миллиардтаған қаражат заңсыз жұмсалғанын анықтады.
«Жол салғанда ұрланған 43.4 млрд теңге „КазГерСтрой“ шотына түскен. Сегіз жобалық-сметалық құжат әзірлеу үшін бөлінген ақша тиімсіз жұмсалған. Мұнда сөз 600 млн теңге жайлы болып отыр. Сонымен қатар құжат дайындағанда „орташа және күнделікті жөндеу жүргізгенде шенділер жоба құнын 2 млрд теңгеге артық көрсетіпті“. Бюджет ақшасын ұрлау үшін мердігер ұйымдар құрылыс материалдарына қатысты 70 жалған сертификат пайдаланған, ал 10 жағдайда стандартқа сай келмейтін материал қолданған», деп мәлімдеді ведомствоның баспасөз қызметі.
Прокурорлардың сөзінше жолға жауапты шенділер мен әкімдік мамандары келісімшарттағы міндетін орындамаған мердігерлердің қарызына да көз жұма қараған. Нәтижесінде атқарылмаған жұмыс үшін төленген 6.8 млрд теңге қазынадан алынып, 636 млн теңге өсімпұл төленбеді.
Прокурорлар бюджеттің 24 млрд теңгесін сақтап қалды және жалпы сомасы 17.3 млрд теңге болатын заңсыз тендерлердің жолын кесті. Заң өкілдері ақылы жолда ақша жинау жүйесінен де шикілік тапқан.
«Тексеріс кезінде Computer Vision Technologies ЖШС қызметі үшін үш есе жоғары баға белгілеп, сома 138.8 млрд теңге құрағаны белгілі болды. Қазір ақша жымқыру, талан-таражға салу, сондай-ақ лауазымын асыра пайдалану (шығын 45 млрд теңгеден асады) фактілері бойынша 23 қылмыстық іс қозғалды. Тергеуді әрі қарай Жемқорлыққа қарсы қызмет пен Қаржы мониторингі агенттігі жалғастырады», — деді Бас прокуратура өкілдері.
ҚР президенті көлік магистралін салу және жөндеу кезінде жұмыс сапасы мен бюджет ақшасының жұмсалуын қатаң қадағалау керек екенін ескерткен.
«Республикалық және жергілікті жолдардың сапасына халықтың көңілі толмайды. Жол сапасының тым нашар болуы жыл сайын жөндеу жүргізуге мәжбүрлейді, оның өзі сапасыз атқарылатындықтан, мемлекет ақшасы тиімсіз жұмсалады. Үкіметке, әкімдіктер мен құқық қорғау органдарына жағдайды түзеуге қатысты жүйелі шара қолданып, есеп беруді тапсырамын», — деді мемлекет басшысы.
Комментариев: 0