Алматы полициясы биыл жыл басынан бері қалада мопед қатысқан 199 апат болғанын хабарлады. Салдарынан 198 адам жараланып, бір кісі қайтыс болған. Ал 2022 жылы осындай 778 оқыс оқиға тіркеліп, 836 адам жараланды және жеті адам көз жұмды.
— Пилоттық жоба аясында әр курьерлік компанияға қызметкеріне нөмір беріп, оны курьер туралы және оның қозғалыс шарты туралы мәліметпен бірге жұмыс берушінің деректер базасына тіркеуді ұсынып отырмыз. «Сергек» кешенінде жеке қозғалыс құралы жүргізушісі жасаған ереже бұзу әрекетін тіркейтін жаңа техникалық мүмкіндік бар, —деді Алматы қаласы полиция департаментінің жергілікті полиция қызметі басқармасының бастығы Ержан Ұзабаев курьерлік компания өкілдерімен кездесуде. Ол жеткізу қызметі ереже бұзған азаматты тез анықтау және бақылау үшін әр қызметкерге нөмір беріп, оны жарыққа шағылысатын элементпен контейнерге жазу керек екенін айтты.
Сондай-ақ курьерлік компания өкілдерінен қызметкерлерін жол ережесін бұзбауға шақыруды сұрады.
Қазақстанда жылдамдығы сағатына 50 шақырымнан аспайтын мопедті тіркемейді. Курьерлер көбіне мопед, велосипед және билік енді ғана заңдастырып жатқан электросамокатпен жүреді. Бірақ олар жол ережесін елемей қарсы жолаққа шығады, тротуармен жүреді немесе бағдаршамның қызыл түсіне өтіп кетеді. Оларды жауапқа тарту мүмкін емес. Оның үстіне полиция курьерлермен күресуге уақыт жұмсағысы келмейтін сияқты.
Бәлкім бұл мәселені «сергек» пен жұмыс берушілер өздері ретке келтіргені жөн шығар, Алматыда жеткізу қызметін ұсынатын кем дегенде бес ірі оператор бар.
Комментариев: 0