Пикап үшін жеңіл автомобильмен тең салық сұралады

Жақында президент қол қойған кодекске енген түзетулер 2024 жылдың 1 қаңтарынан бастап күшіне енеді. Құжатқа сәйкес Салық кодексінің 492-бабының 4-тармағының 1-тармақшасының үшінші абзацынан «жеңiл автомобиль шассиiндегі» деген сөздер алынып тасталады.

Нәтижесінде «жүкке арналған платформасы және жүк бөлiгiнен қатты стационарлық қабырғамен бөлiнген жүргiзушi кабинасы бар моторлы көлiк құралдары (пикап автомобильдер)» жеңіл автомобиль болып саналады. Яғни, бұл Mitsubishi L200-ге ғана емес, басқа автомобильдерге де қатысты болады.

Ford F-Series сияқты ірі пикап иелері жүк көтергіштігіне байланысты 5-9 АЕК-ке дейін (2024 жылы 18 460-33 228 теңге*) салық төлейтін еді. Мұндай модификацияның жеңіл автомобильдерге ешқандай қатысы болмағандықтан, жүк көлік санатына жататын.

Екінші мысал: жол талғамайтын, класы бойынша BN1G категориясына жататын UAZ Pickup.

2024 жылдың 1 қаңтарынан бастап жеңіл автомобиль сияқты осындай автомобильдің қозғалтқыш көлеміне қарай бюджетке ақша құю қажет болады.

Қозғалтқыш көлемі 4000 текше см-ден асатын пикап үшін енді кем дегенде 117 АЕК (2024 жылы 431 964 теңге), ал Қазақстанға 2013 жылғы 31 желтоқсаннан кейін келген автомобиль үшін 130 АЕК (2024 жылы 479 960 теңге) төлеуге тура келеді.

Салықшылар борттық жүк платформасы бар «газель» мен фургон иелерін жүк көлігі категорясына екі жыл бұрын ауыстырды. Содан бері олар жүк көтергіштігіне байланысты салық төлеп келеді.

Кодекске тағы бір өзгеріс енеді, оған сәйкес ұрланған автомобильге салынатын салықты есептеу «Көлік құралы ұрланғаны туралы сотқа дейінгі тергеп-тексерудің бірыңғай тізілімінде өтініш тіркелген күннен бастап» тоқтайды. Кодекстің қолданыстағы редакциясында ұрлау туралы қылмыстық іс қозғалған күннен бастап салық есептелмейді. Бірақ шын мәнінде өтініш жазу мен іс қозғау арасында көп уақыт өтеді.

Қылмыстық іс жабылғаннан кейін және автомобильді иесіне қайтарғаннан кейін полицейлердің анықтамасы негізінде салықты есептеу қайта басталады.

2024 жылы бір АЕК 3 692 теңге болады.