Петропавл әкімдігі көліктің орташа жылдамдығын өлшейді

Өңірде іске қосылуы мүмкін жоба жаппай айыппұл салуға арналмаған. Петропавловск.news хабарлағандай, қала билігі орташа жылдамдықты тіркеу үшін жасанды интеллект элементі бар камера пайдалануды жоспарлап отыр.

— Біз мердігерлерге қалада көліктің орташа жылдамдығын есептеуге мүмкіндік беретін жүйе әзірлеуді ұсындық. Бұл автомобильді радармен аңдимыз деген сөз емес. Қалада жүрген машинаның қиылыстан қиылысқа дейінгі орташа жылдамдығын есептейміз. Мақсат біреуге айыппұл салу емес, көлік жүргізу тәртібін жақсартып, тәртіпті қадағалау, — деді Петропавл қаласының әкімі Серік Мұхамедиев.

Билік технологияны биыл енгізуге ниетті. Оның қашан және қай көшелерде іске қосылатыны кейін анықталады.

«Жол қозғалысы туралы» заңның 1.29-1-бабында және ҚР Жол ережесінің 1.45-1-тармағында: «Көлік құралының орташа жылдамдығы — халықаралық және республикалық маңызы бар жол бөлігінің ұзындығын көлік құралының осы аралықты жүріп өткен уақытына бөлу арқылы айқындалатын жылдамдық» деп жазылған. Демек шенділерінің бұл идеясы аталған құжаттарға сай келмейді. Сондықтан Петропавлда орташа жылдамдық үшін айыппұл салынса, тұрғындар шағым түсіре алады. Кем дегенде заң мен ережеге өзгеріс енгенше оған қарсы дау айтуға негіз бар.

Бұған дейін Алматы полицейлері қалада орташа жылдамдықты өлшемек болған. Жүйе 2019 жылы іске қосылуға тиіс еді, бірақ жоба басталмай қалды. Өйткені ол кезде «орташа жылдамдық» ұғымы заң жүзінде бекітілмеген. Термин «Жол қозғалысы туралы» заң мен Жол ережесіне 2024 жылы ғана қосылды. Дегенмен қазір орташа жылдамдықты асырғаны үшін тек трассада айыппұл салуға мүмкіндік бар.