Ақтөбе патрульдік полициясы батальонының аға сержанты Әсет Зайнуллинге Ақтөбе облыстық Сыбайлас жемқорлыққа қарсы комитет жетекшісі Мирлан Мұхамбетов басшылығы мен әріптестерінің алдында салтанатты түрде алғыс хат табыстады.
Жемқорлыққа қарсы күресушілердің баспасөз қызметі хабарлағандай, полицей мас күйінде көлік тізгіндеген Lexus жүргізушісін тоқтатқан. Ер адам ақша беріп, мәселені шешпек болғанда, тәртіп сақшысы одан үзілді-кесілді бас тартады және әлгінің атына ҚР ӘҚБК-нің 608-бабының 1 бөлігі (Көлік құралын масаң күйде басқаруы, көлік құралын басқару құқығынан үш жыл мерзімге айыруға әкеп соғады) бойынша хаттама толтырады. Келесі күні ереже бұзушы инспектордың телефон нөмірін тауып алып, хабарласады да, мәселені хаттамасыз шешуді ұсынады. Полицейдің бас тартқанына қарамастан, маскүнем оның телефонына 5 000 теңге аударып, алғыс сөздері жазылған SMS жібереді.
«Антына адал Әсет Зайнуллин бұл жайында бірден басшылыққа хабарлаған», — дейді жемқорлыққа қарсы күресушілер. Мекеме қызметкерінің айтуынша, полиция департаментінің өзіндік қауіпсіздік басқармасы істі Сыбайлас жемқорлыққа қарсы қызметке тапсырады. Нәтижесінде сот пара бергіш жүргізушіге 200 АЕК (505 000 тг) көлемінде айыппұл салу жөнінде шешім шығарды. Ал адал қызметкерге алғыс айтуды ұйғарған.
Комментариев: 0