Шығыс Қазақстан облысында болған келеңсіз жайт әлеуметтік желіде тарады. Оның кадрларынан қиылысқа тоқтаған қызметтік уазиктен шыққан полицейдің жүгіріп бара жатқанын байқауға болады. Содан кейін тәртіп сақшысы резеңке таяқ секілді затпен мотоциклшіні ұрмақ болады. Соққыдан қашқан байкер газонға шығып кетеді де, жоғары жылдамдықпен жол шетінде тұрған көлікке соғылады.
Әлгінде ұрмақшы болған полицей жүгіріп келіп, мотоциклшіні соққының астына алады. Сол аралықта сары жилет киген екі ер адам (олар да полиция қызметкерлері сияқты) жүгіріп келіп, жас жігітті үшеулеп жұдырықтай бастайды.
Шығыс Қазақстан облысы Полиция департаментінің баспасөз қызметі келеңсіз оқиғаның Алтай қаласында болғанын хабарлады. Олардың айтуынша, жиырма үш жастағы мотоциклші қала көшелерімен тым жылдам әрі қатты дыбыс шығарып қозғалған. Қала тұрғындары шағым түсіргендіктен, полицейлер жігітті құрықтамақ болды. Ол тәртіп сақшыларының тоқта деген талабын елемей, автокөлікті қағып, оқиға орнынан қашпақ болды. Нәтижесінде оған күш қолданылды.
Сол арада роликтің кадрларынан жоғары жылдамдықта келе жатқан мотоциклшінің жеңіл көлікке соғылуына полицейдің себепші болғаны көрініп тұр. Одан бөлек, апаттан кейін жігіт зақым келген көліктің қасында тұрды. Оқиға орнын тастап кетуге тырысқан жоқ, бірақ полицейлер сонда да оны соққыға жықты.
Мотоциклшінің атына төрт хаттама толтырылды, оның ішінде жүргізуші куәлігінсіз көлік тізгіндегені үшін де. Бірақ бұл ұстау барысында осындай қатыгездік танытуға себеп бола ма?
Комментариев: 0