Өзбекстан тұрғыны көлігін күн энергиясымен қуаттап жүр

Ташкент облысында тұратын Song Plus иесі ерекше эксперимент жасап, электрокарға «тегін» қуаттау станциясын орналастырған.

Әлеуметтік желіде тараған видеоны Avtoelon.uz басылымы жариялады. Тұрғын кроссовердің төбесіне күн панелін орнатып алыпты.

Қуаттау жүйесіне мыналар кіреді:

• 640 Вт күн панелі;
• контроллер;
• күн энергиясын жинайтын аккумулятор;
• автомобильді қуаттауға арналған жүйе.

Осылайша арнайы бекетсіз-ақ батареяны толтыруға мүмкіндік беретін қолдан жасалған автономды электростанция пайда болған. Жүйенің жұмысын көрсеткен видеодан күн ашық кезде BYD қуат ала бастағанын, оның көлемі 1 кВт-қа жеткенін көруге болады.

Әрине, ол өте баяу әрекет етеді. Оның үстіне тағы бірнеше нюанс бар: күн бұлтты кезде мұндай жүйенің тиімділігі төмендейді, ал түнде мүлде жұмыс істемейді.

Бірақ статистикаға сүйенсек, Өзбекстанда шамамен бір жылдың 300 күні шуақты. Яғни жыл бойы күн энергиясын пайдалануға мүмкіндік бар.

Кабельді қосу үшін терезені немесе жүксалғышты сәл ашық қалдыру қажет.

Демек бұл жүйе әдеттегі станцияның орын баса алмайды. Күн панелі күндіз және машина жеке аулада тұрғанда ғана батареяға энергия толтыра алады. Ал мұндайда панельді көліктің төбесіне орнатудың қажеті шамалы. Оны үйдің шатырына қоя салған әлдеқайда ыңғайлы болар еді.

Панель алыс сапарға шыққанда пайдалы шығар. Алайда шатырдағы құрылғыны заңдастыру мәселесі туындауы ықтимал, жабдық техниканың төбесі мен жүксалғышынан біраз орын алатыны тағы бар.