Биыл қаңтарда Өзбекстаннан екі қызық жаңалық келді. Айдың ортасында Экология министрлігі Ташкентте 2010 жылға дейін шыққан барлық көлікке тыйым салу жоспарын жария етті, кейін қаңтардың аяғында президент Шавкат Мирзиёев ұқсас ұсыныс жасады, бірақ ол елордада 10 жастан асқан барлық техниканың қозғалысын шектеу керек деді. Яғни, биыл 2014 жылғы автомобиль жарамсыз болуы мүмкін.
Өзбекстанда бұл бағыт бойынша жұмыс қарқынды жүріп жатқанға ұқсайды. Президенттің баспасөз қызметі хабарлағандай, Ташкенттің жол қозғалысы қауіпсіздігі басқармасының тiркеуге алу-емтихан өткiзу бөлiмшелерiнің бірі қайта қаралған әдістеме бойынша жұмыс істейтін диагностикалық орталыққа айналды.
Басты жаңалық автомобильдердің ауаны ластау деңгейін тексеру және қызыл, сары немесе жасыл түсті арнайы RFID белгісі бар стикер жасау болды. Болашақта бұл жапсырмалар экологиялық жағдайға қарай бөлінген Ташкенттің бір аймағына кіруге рұқсат беру қызметін атқарады.
Аймақты қадағалау автоматты түрде орындалады. Жиналған айыппұл экологияны жақсарту шараларын қаржыландыруға жұмсалады.
Жүйе толық жұмыс істеуі үшін Өзбекстанда ауа сапасын бақылайтын шамамен 100 автоматты станция мен 84 тiркеуге алу-емтихан өткiзу орталығы болады.
Мемлекет халықты электрлі көлік алуға ынталандыратын шаралар дайындап жатыр.
Өзбекстандағы көліктердің жасы Қазақстаннан өзгеше екенін ескеру керек. Автомобильдің орташа жасы шамамен 11 жыл (2022 жылғы мәлімет бойынша) және көрсеткіш жыл сайын жақсарып келеді. Біздің елдегі машиналар әлдеқайда ескі. Яғни, көрші елде 2014 жылдан ерте шыққан техника шынымен ескі болып саналады. Соңғы 6-7 жылда автомобиль нарығы еселеп өскен, 2024 жылдың басындағы мәлімет бойынша небәрі 4.1 миллионнан астам көлік тіркеліпті. 2021 жылдың басында 2.8 млн болса, 2016 жылдың қаңтарында 1.9 млн болған.
Комментариев: 0