Оқиға маусымның 2-нен 3-іне қараған түні, үш жарым шамасында Алматыдағы Әл-Фараби мен Розыбакиев қиылысында болған. Оны куәгерлер видеоға түсіріп алыпты. Кадрдан өртеніп жатқан Toyota Land Cruiser (жүргізуші жоқ сияқты) даңғыл бойымен қозғалып, жол ортасындағы көгалды кесіп өтіп, қарсы беттегі ағашқа тіреліп тоқтағанын көруге болады.
Жергілікті Төтенше жағдайлар департаменті Әл-Фараби бойында 2003 жылғы Toyota Land Cruiser өртеніп кеткенін хабарлады. Мамандар жалынды бірнеше минутта сөндірді. Жүргізуші мен жолаушы көлік отқа оранбай тұрып салоннан шығып кетіпті, олар ауруханаға жатқан жоқ.
Төтенше жағдай мамандары өртке газ-ауа қоспасының жарылуы себеп болған деген болжам айтады. Басқаша айтқанда машинадағы газ баллон құрылғысы жарылған.
ҚР ІІМ көліктегі өрт жалпы оқыс оқиғаның 20 %-ын құрайтынын мәлімдеді. Полицейлер мұндай апатқа ГБҚ орнатқан кей машинада артық қысым клапанының болмауы себеп болатынын айтады. Баллонды 85 %-дан асырып толтырса, температура көтерілген кезде газ көлемі артып, жарылысқа әкеледі.
Соған қарамастан 2022 жылы күзден бастап елде техбайқау алдында ГБҚ тексеру талабы күшін жойды. Себебі, елде оны тексеретін арнайы орталықтар жоқ.
Комментариев: 0