BMW компаниясы Оңтүстік Корея қазынасына 9.9 млн доллар құюға міндеттелді. Аталған компанияға айыппұлды елдің Жер, көлік және теңіз істері министрлігі салған.
Шенділердің талабына сай, автокөлік өндіруші пайдаланылған газды қайта айналдыру жүйесін салқындатқыштың (EGR) ақауын жасырған екен. Мұндай ақау көліктің жанып кетуіне әкеп соғуы ықтимал. Тек 2018 жылдың өзінде Оңтүстік Кореяның жолдарында елуден аса BMW тұтанған.
Ақпаратқа сүйенсек, BMW компаниясы бұл мәселе жөнінде 2015 жылдан-ақ хабардар болған көрінеді, алайда олар мәселені тыныш қана шешпек болыпты. 2016 жылы қозғалтқыштардың құрылымына аздаған өзгерістер енгізген, дегенмен оның пайдасы болмапты. Ақау жайлы ақпарат БАҚ арқылы тарап кеткеннен кейін ғана бавариялықтар ресми қызмет кампаниясын бастаған. Бұл Оңтүстік Корея аумағындағы 170 мың көлікті қамтыса, тағы 324 мың темір тұлпар Еуропада жөндеуден өтеді.
Комментариев: 0