Оң рөлді көлік шанағын әкелуге тыйым жарты жылға ұзарады

Өнеркәсіп және құрылыс министрлігі «Оң рөлді жеңіл автомобильдердің кей түрін әкелуді реттеу мәселелері туралы» бұйрық дайындады. Құжат әлі жоба күйінде, бірақ жақын арада жарияланады. Ол 2024 жылғы 17 шілдеден бастап туындаған құқықтық қатынастарға қолданылады.

Бұйрықтың атауы таныс көрінуі тегін емес. Осындай жарты жылдық тыйым 16 қаңтарда күшіне енген, қазір оны ұзартуға шешім қабылданды.

Мәтін уәкілетті органдарға қаңтардағы құжаттағыдай төмендегіні бұйырады:

«Қазақстанға 8703 21 109 1 қоспағанда 8703 21*-ден; 8703 22*-ден; 8703 23*-тен; 8703 24*-тен; 8703 31*-ден; 8703 32*-ден; 8703 33*-тен; 8703 40 109 қоспағанда 8703 40*-тан; 8703 50*-ден; 8703 60 109 қоспағанда 8703 60*-тан; 8703 70*-ден; 8703 80 000*-ден; 8703 90 00*-ден; 8706 00 910*-ден; 8707 10 900 0*-ден; 8707 90 900 9*-ден оң рөлді жеңіл автомобильді бөлшектелген күйде әкелуге алты ай мерзімге тыйым салынсын».

Бұл кодтар қозғалтқышы бар шассиді, сондай-ақ жеке шанақты және бензин немесе дизель қозғалтқышы бар автомобильді, гибридті білдіреді. Электромобильді бөлек қарастырады. Квадроциклдер бұған кірмейді.

2011 жылдан бастап Қазақстанда оң рөлді көлікті кедендік рәсімдеуге және алғашқы тіркеуге қоюға болмайды, көлік құрылымының қауіпсіздігі туралы куәлік те берілмейді. Мұндай машинаны елге әкелуге одан да ерте, 2007 жылғы 1 қаңтарда тыйым салынған. Бұл шараларды «конструктор»-көлікпен күресудің бір тәсілі деп санауға болады.