Алдын ала мәліметтер бойынша, 15:00 шамасында Щучинск — Нұр-Сұлтан автожолында екі ірі жол апаты болды. Бірінде 20, екіншісінде 16 бағыттас машина соқтығысқан. Апаттан бес адам зардап шекті, ішінде екі жасар бала бар.
Тағы бір жол апаты Нұр-Сұлтан — Теміртау тас жолында 16:00-де болды. Мұнда ақ түтек боран соғып, айналаны көру қиындаған. Қолайсыз ауа райы 15 көлік құралының, нақтырақ айтсақ 3 фура, 2 шағын жүк көлігі мен 10 жеңіл көліктің соғылуына себеп болды. Апаттан зардап шеккендер жоқ. Оқиғаның жай-жапсарын полицейлер анықтауда.
Естеріңізге сала кетейік, қазіргі уақытта елдің солтүстігі мен шығысында қар толассыз жауып жатыр. «ҚазАвтожол» ҰК" АҚ-ы берген ақпаратқа сәйкес, тас жолдардың төрт облыстағы жеті бөлігінде жол жабық:
- Екатеринбург — Алматы, 1 291–1 426-км.
- Нұр-Сұлтан — Щучинск, 18–231-км (ақылы бөлік).
- Нұр-Сұлтан — Ерейментау — Шідерті, 16–235-км, Нұр-Сұлтан — Шідерті.
- Екатеринбург — Алматы, 1 006–1 247-км, Атбасар — Нұр-Сұлтан.
- Үшарал — Достық, 83–184-км, Көктұма — Достық.
- Екатеринбург — Алматы, 1 426–1 457-км, ақылы бөліктің терминалы — Қарағанды.
- Қызылорда — Павлодар, 970–1 066-км, Қарағанды — Молодёжный.
Республикалық маңызға ие жолдардың 1 036 шақырымында қозғалыс шектелген. Қар тазалау жұмыстарына 752 техника тартылды.
14.02.2020 10:53-те толықтырылды: Белгілі болғандай, ірі апаттан зардап шеккен 34 жастағы ер адам астанадағы ауруханада көз жұмды. Дәрігерлердің айтуынша, басынан және аяғынан жарақат алған ол ес-түссіз күйде емханаға жеткізілген. Кешенді реанимациялық шаралар оң нәтиже бермеді.
Сонымен қатар, марқұмның жол-көлік оқиғасы болған сәтте жолаушы орындығында отырғаны хабарланды. Бұл дерек бойынша ҚР ҚК-нің 345-бабы (Көлiк құралдарын басқаратын адамдардың жол жүрісі немесе көлiк құралдарын пайдалану қағидаларын бұзуы) бойынша сотқа дейінгі тергеу жұмыстары басталды.
Комментариев: 0